బాలీవుడ్ నటుడు సుశాంత్ సింగ్ రాజ్పుత్ ఆత్మహత్య కేసును పట్నాలో నమోదు చేయడం చట్టపరంగా చెల్లుబాటు అవుతుందని మంగళవారం బిహార్ ప్రభుత్వం సుప్రీంకోర్టుకు తెలియజేసింది. ఈ కేసులో మహారాష్ట్ర పోలీసులు సహకరించడం లేదని ఆరోపించింది. కనీసం సుశాంత్కు సంబంధించిన పోస్ట్మార్టమ్ రిపోర్టును కూడా ముంబయి పోలీసులు అందించలేదని బిహార్ గవర్నమెంట్ వెల్లడించింది.
ఆయన హస్తం ఉంది
సుశాంత్ మరణంపై ముంబయి పోలీసులు ఇప్పటికీ ఎఫ్ఐఆర్ నమోదు చేయలేదని బిహార్ ప్రభుత్వ తరపు న్యాయవాది మనీందర్ సింగ్.. జస్టిస్ హృషికేశ్ రాయ్ నేతృత్వం వహించిన ధర్మాసనానికి వెల్లడించారు. రాజకీయ ఒత్తిడి, పక్షపాతం కారణంగా నటి రియా చక్రవర్తిపై బిహార్ రాష్ట్ర గవర్నమెంట్ నేరారోపణలు మోపుతుందన్న ప్రచారాన్ని తిప్పికొట్టారు. ఈ కేసును పట్నా నుంచి ముంబయికి బదిలీ చేయాలన్న నటి రియా వ్యాజ్యంపై వాదనలు జరిగాయి. దీని వెనుక బిహార్ ముఖ్యమంత్రి హస్తం ఉందని.. దర్యాప్తు చేయడానికి ఆయనే వ్యక్తిగతంగా ఓ ఐపీఎస్ ఆఫీసర్ను నియమించారన్న వాదనలను బలంగా తిప్పికొట్టారు న్యాయవాది మనీందర్ సింగ్.
ఎందుకు ఆలస్యం చేశారు?
సుశాంత్ మృతికి నటి రియా కారణమని ఆరోపణలతో అతడి తండ్రి పట్నాలో కేసు నమోదు చేశారని.. అయితే సుశాంత్ మృతికి పట్నాకు ఎలాంటి సంబంధం లేని రియా తరపు న్యాయవాది శ్యామ్ దివాన్ ధర్మాసనానికి తెలియజేశారు. కేవలం పక్షపాతంతోనే ఈ కేసు పెట్టారని తెలిపారు. ఫిర్యాదు చేయడానికి 38 రోజులు ఎందుకు పట్టిందని ప్రశ్నించారు. సుశాంత్ తండ్రి కేకే సింగ్ చేసిన ఫిర్యాదుతో ముంబయి పోలీసులకు సంబంధం ఉందని దివాన్ పేర్కొన్నారు. ముంబయి పోలీసులు ఈ కేసు దర్యాప్తులో ఇప్పటికే 56 మందిని విచారణ చేసినట్లు తెలిపారు.
తమ రాష్ట్ర పరిధిలో ఉన్న కేసును పట్నా పోలీసులు దర్యాప్తు చేయడాన్ని వ్యతిరేకించారు మహారాష్ట్ర తరపు న్యాయవాది అభిషేక్ మను సింఘ్వి.
