How To Protect Yourself From Romance Scams : ప్రస్తుత కాలంలో సాంకేతికత రోజురోజుకు కొత్త పుంతలు తొక్కుతోంది. దాదాపు అందరూ ఆన్లైన్లోనే తమ దైనందిన కార్యకలాపాలు పూర్తి చేసుకుంటున్నారు. ముఖ్యంగా నేటి యువతీయువకులు డేటింగ్కు కూడా ఆన్లైన్నే మాధ్యమంగా ఎంచుకుంటున్నారు. అందుకే సైబర్ నేరగాళ్లు వీరిని లక్ష్యంగా చేసుకుని రొమాన్స్ స్కామ్లకు పాల్పడుతున్నారు. ఇంతకూ రొమాన్స్ స్కామ్ అంటే ఏమిటి? దీని నుంచి ఎలా బయటపడాలో ఇప్పుడు తెలుసుకుందాం.
రోమాన్స్ స్కామ్ అంటే ఏమిటి?
స్కామర్స్ ఆన్లైన్ వేదికగా అందమైన అమ్మాయిలు/ అబ్బాయిల ఫొటోలను పెట్టి యువతను ఆకర్షిస్తారు. ఆకర్షణీయమైన ఫేక్ ఫ్రొఫైల్లను క్రియేట్ చేసి.. అమాయకులను మెల్లగా వారి ట్రాప్లోకి తీసుకుంటారు. తరువాత వారి నుంచి డబ్బును దోచేస్తారు. ఈ పద్ధతినే రొమాన్స్ స్కామ్ (వలపు వల) అంటారు.
ఏవిధంగా జరుగుతుందంటే?
స్కామర్స్ కొంతకాలం మీతో ఆన్లైన్లో డేటింగ్ చేస్తారు. ఆ సమయంలో మీకు వారిపై పూర్తిగా నమ్మకం కలిగేలా చేస్తారు. ఆ తరువాత తమకు తీవ్రమైన ఆర్థిక సమస్య ఉందని చెబుతారు. మీరు తప్ప తమను ఆదుకొనేవారు ఎవరూ లేరని నమ్మిస్తారు. మీరు కనుక ఈ ట్రాప్లో పడి ఒక సారి డబ్బు పంపితే చాలు.. ఇక అప్పటి నుంచి పదే పదే డబ్బులు అవసరమని మిమ్మల్ని వేధిస్తుంటారు. అందుకే ఆన్లైన్లో కనిపించే, గుర్తు తెలియని వారితో పరిచయాలు, స్నేహాలు పెంచుకోవడం మంచిది కాదు. మరీ ముఖ్యంగా ప్రేమ వ్యవహారాలు నడపడం ఏ మాత్రం క్షేమం కాదు.
రొమాన్స్ స్కామ్ నుంచి మిమ్మల్ని మీరు ఎలా రక్షించుకోవాలంటే?
- ఆన్లైన్లో మీ పట్ల ప్రేమ చూపించే.. మీకు తెలియని వ్యక్తుల పట్ల జాగ్రత్త వహించండి.
- పరిచయం అయిన కొద్ది రోజులకే ప్రేమ సందేశాలు పంపించేవారిని అస్సలు నమ్మకండి.
- మీతో ఆన్లైన్లో డేటింగ్ చేస్తున్న వ్యక్తుల వివరాలు అన్నీ ముందే తెలుసుకోవాలి.
- ఎట్టి పరిస్థితుల్లోనూ వ్యక్తిగతంగా తెలియని వారికి డబ్బులు పంపించకూడదు.
- మీరు డేటింగ్ చేస్తున్న వారి ఫోటోలను, వారి వివరాలను సోషల్ మీడియా హ్యాండిల్స్లో వెతకండి.
- మీతో ఆన్లైన్లో డేటింగ్ చేస్తున్న వారు ఏవైనా ఇతర స్కామ్లకు పాల్పడుతున్నారేమో తెలుసుకోండి.
- ఒక వేళ మీరు మోసాగాళ్ల చేతిలో చిక్కుకున్నారని గ్రహిస్తే.. వెంటనే పోలీసులకు ఫిర్యాదు చేయండి.
- మీతో ఆన్లైన్ డేటింగ్ చేస్తున్నది స్కామర్స్ అని గ్రహిస్తే.. వెంటనే సంబంధిత వెబ్సైట్, యాప్లో రిపోర్ట్ చేయండి.
- వీలైనంత వరకు ఆన్లైన్ డేటింగ్ యాప్లు వాడకపోవడమే మంచిది.
యుక్తవయస్సులో ఆకర్షణలకు లోనుకావడం చాలా సహజం. అయితే ఆన్లైన్లో డేటింగ్ చేసేటప్పుడు చాలా అప్రమత్తంగా ఉండాలి. అవసరమైతే కుటుంబ సభ్యుల సహకారం తీసుకోవాలి. అప్పుడే రొమాన్స్ స్కామ్స్ నుంచి సురక్షితంగా బయటపడవచ్చు.
ఆన్లైన్లో వలపు వల.. చిక్కితే జీవితాలు విలవిల
Cyber Crimes: మీకు ఇలాంటి మెసేజ్లు వస్తున్నాయా... అయితే ఓ లుక్కేయండి
