Ukraine conflict: ఉక్రెయిన్లో మానవతా కార్యకలాపాలు చేపట్టేందుకు మంగళవారం ఉదయం 10 గంటల(రష్యా కాలమానం ప్రకారం) నుంచి ఐదు నగరాల్లో తాత్కాలిక కాల్పుల విరమణ ప్రకటించింది రష్యా. రాజధాని కీవ్, చెర్నిహివ్, సుమీ, ఖార్కివ్, మరియుపోల్ నగరాల్లో కాల్పులకు విరామం పలికినట్లు ఆ దేశ విదేశాంగ శాఖ తెలిపింది.
సోమవారం బెలారస్లో ఇరు దేశాల మధ్య మూడో విడత చర్చలు జరిగిన తర్వాత ఈ పరిణామాలు చోటు చేసుకుంటున్నాయి. సుమారు మూడు గంటల పాటు సాగిన ఈ చర్చల్లో పౌరుల తరలింపు సహా ఇతర కీలక అంశాలను ఇరు దేశాలు లేవనెత్తాయి. మంగళవారం నుంచి పౌరుల తరలింపునకు మానవతా కారిడార్ పనిచేస్తుందని ఉక్రెయిన్ తెలిపింది. ఈ క్రమంలోనే కాల్పుల విరమణ ప్రకటించినట్లు తేలుస్తోంది.
" 2022, మార్చి 8న ఉదయం 10 గంటల నుంచి మానవతా కారిడార్ ఏర్పాటు కోసం రష్యన్ ఫెడరేషన్ కాల్పుల విరమణ ప్రకటించింది. పౌరుల తరలింపునకు కీవ్, చెర్నిహివ్, సుమీ, ఖార్కివ్, మరియుపోల్ నగరాల్లో కాల్పుల విరమణ ఉంటుంది. ఉదయం 3 గంటల లోపు పౌరుల తరలింపునకు అవలంభిస్తున్న విధానాన్ని ఉక్రెయిన్ తెలియజేయాలి. అలాగే రాతపూర్వక ఆమోదం, ఆయా మార్గాల్లో భద్రతకు హామీ ఇవ్వాలి."
- రష్యా విదేశాంగ శాఖ.
మార్చి 10న ఇరు దేశాల విదేశాంగ మంత్రుల భేటీ
ఉక్రెయిన్, రష్యా మధ్య ఉద్రిక్తతలు కొనసాగుతున్న వేళ చర్చల్లో మరో కీలక అడుగు పడింది. మార్చి 10న ఇరుదేశాల విదేశాంగ మంత్రులు భేటీ కానున్నారు. రష్యా విదేశాంగ మంత్రి సెర్గీ లావ్రోవ్తో భేటీ అవుతున్నట్లు ధ్రువీకరించారు ఉక్రెయిన్ విదేశాంగ మంత్రి దిమిత్రో కులేబా.
కీవ్లోనే ఉన్నా: జెలెన్స్కీ
రష్యా దాడులు కొనసాగుతున్న క్రమంలో మరో వీడియో ద్వారా సందేశం అందించారు ఉక్రెయిన్ అధ్యక్షుడు వొలొదిమిర్ జెలెన్స్కీ. తాను రాజధాని నగరం కీవ్లోనే ఉన్నానని, ఎక్కడికి పారిపోలేదని స్పష్టం చేశారు. ఈ మేరకు సోమవారం రాత్రి ఫేస్బుక్ పేజీలో వీడియోను పోస్ట్ చేశారు. తన కార్యాలయం నుంచి నగర పరిసరాలను వీడియోలో చూపించారు.
"నేను కీవ్లోని బాంకోవా వీధిలోనే ఉన్నాను. ఎక్కడికీ వెళ్లిపోయి దాక్కోలేదు. ఎవరికీ భయపడటం లేదు. "
- వొలొదిమిర్ జెలెన్స్కీ, ఉక్రెయిన్ అధ్యక్షుడు.
ఇరు దేశాల మధ్య బెలారస్-పోలాండ్ సరిహద్దుల్లో సోమవారం మూడో విడత చర్చలు ముగిసిన కొద్ది గంటలకే ఈ వీడియో విడుదల చేశారు జెలెన్స్కీ. అయితే.. మూడు గంటలు సాగిన చర్చల్లో ఎలాంటి కీలక పురోగతి కనిపించలేదు.
ఉక్రెయిన్కు ప్రపంచ బ్యాంక్ భారీ సాయం..
రష్యాపై పోరాడుతున్న ఉక్రెయిన్కు 723 మిలియన్ డాలర్ల భారీ ఆర్థిక ప్యాకేజీకి ఆమోదం తెలిపింది ప్రపంచ బ్యాంకు. ఉక్రెయిన్లోని ఆర్థిక అత్యవసర పరిస్థితి నుంచి బయటపడేందుకు సప్లమెంటరీ బడ్జెట్ సపోర్ట్ ప్యాకేజీకి సోమవారం ప్రపంచ బ్యాంకు ఎగ్జిక్యూటివ్ డైరెక్టర్లు ఆమోదం తెలిపారని పేర్కొంది. 'బోర్డు ఆమోదించిన ప్యాకేజీలో 350 మిలియన్ డాలర్లు అనుబంధ రుణం, 139 మిలియన్ డాలర్లు గ్యారెంటీ, 134 మిలియన్ డాలర్లు గ్యాంట్ ఫైనాన్సింగ్, 100 మిలియన్ డాలర్లు ఫైనాన్సింగ్ సమీకరణ వంటివి ఉన్నాయి. దీని ద్వారా ఉక్రెయిన్ ప్రజలకు అత్యవసర సేవలు అందించేందుకు ఉపయోగపడుతుంది.' అని తెలిపింది.
ఇదీ చూడండి:
