ప్రముఖ నటుడు షారుక్ ఖాన్ కుమారుడు ఆర్యన్ ఖాన్ నిందితుడిగా ఉన్న ముంబయి క్రూజ్ డ్రగ్స్ కేసుకు సంబంధించిన రిపోర్టును విజిలెన్స్ అధికారులు సమర్పించారు. విచారణలో పలు లోపాలను గుర్తించినట్లు తెలిపారు. ఇందులో సమీర్ వాంఖడే దర్యాప్తు అధికారిగా ఉన్నప్పుడు పలు అక్రమాలు జరిగాయని పేర్కొన్నారు. కొంత మంది అధికారులు అనుమానాస్పదంగా ప్రవర్తించారని రిపోర్టులో పేర్కొన్నారు. షారుక్ తనయుడు ఆర్యన్ ఖాన్ను కావాలనే టార్గెట్ చేశారని స్పష్టం చేశారు.
ఆర్యన్ ఖాన్ కేసుతో పాటు ఈ అధికారులు చేసిన ఇతర కేసుల దర్యాప్తుల్లో కూడా లోపాలు కనిపించాయి. వీటన్నింటికి సంబంధించిన నివేదికను విజిలెన్స్ అధికారుల బృందం దిల్లీలోని ప్రధాన కార్యాలయానికి పంపించింది. ఈ తప్పిదాలకు పాల్పడిన ముంబయి ఎన్సీబీ జోనర్ డైరక్టర్తో పాటు ఇతర అధికారుపై తగిన చర్యలు తీసుకోవాలని సూచించింది.
క్రూజ్ డ్రగ్స్ కేసులో ఎన్సీబీ 14 మంది నిందితులపై గత మే 27న 6 వేల పేజీల చార్జ్షీట్ ఫైల్ చేసింది. అయితే ఇందులో ఐదుగురి పేర్లను తొలగించింది. అందులో ఆర్యన్ ఖాన్ కూడా ఉన్నారు. అయితే ఆర్యన్ ఖాన్ డ్రగ్స్ కేసు తప్పుడు దర్యాప్తు నేపథ్యంలో.. మాజీ ఎన్సీబీ అధికారి సమీర్ వాంఖడేపై కేంద్ర ప్రభుత్వం గత మేలో విచారణకు ఆదేశించింది. అనంతరం విచారణ ప్రారంభించిన ఎన్సీబీ.. ఆర్యన్ ఖాన్కు క్లీన్ చిట్ ఇచ్చింది.
2021 అక్టోబర్‌ 2న ముంబయి తీరప్రాంతంలో క్రూజ్ నౌకలో జరిగిన రేవ్‌ పార్టీపై ఎన్సీబీ అధికారులు దాడులు నిర్వహించారు. ఆ ఘటనలో ఆర్యన్ ఖాన్తో పాటు మరికొంతమందిని అరెస్టు చేశారు. అక్టోబర్‌లో అరెస్టయిన ఆర్యన్ ఖాన్.. 25 రోజుల తర్వాత బెయిల్‌పై విడుదలయ్యారు.
ఇవీ చదవండి : బేబీ బంప్ ట్రెండ్.. ఖరీదైన బైక్పై ప్రెగ్నెంట్ లేడీ ఫొటోషూట్
