క్యాష్బ్యాక్ ఆఫర్ల లొసుగులు వాడుకుని పేటీఎంలో దాదాపు రూ.10 కోట్ల మోసం జరిగినట్లు సంస్థ అంతర్గత విచారణలో తేలింది. ఇందుకు కారణమైన కొంత మంది సిబ్బందిని విధుల నుంచి తొలిగించి, మోసానికి పాల్పడిన వ్యాపారులను డీలిస్ట్ చేసినట్లు పేటీఎం పేర్కొంది.
"పేటీఎంలో చిన్న వ్యాపారులకు భారీగా క్యాష్బ్యాక్లు అందుతున్నట్లు అంతర్గత విచారణలో తేలింది. వీటి ద్వారా దాదాపు రూ.10 కోట్ల మోసం జరిగినట్లు గుర్తించాం. మోసానికి పాల్పడిన వ్యాపారులను ప్లాట్ఫాం నుంచి తొలగించాం. ఇందుకు సహకరించిన ఉద్యోగులను విధుల నుంచి తప్పించాం."
-విజయ్ శేఖర్ శర్మ, పేటీఎం వ్యవస్థాపకుడు
ఇదీ అసలు కథ
గతేడాది దీపావళి తర్వాత కొందరు చిన్న వ్యాపారులకు భారీగా క్యాష్ బ్యాక్లు రావడం గమనించారు సంస్థ నిర్వాహకులు. అనుమానంతో మరోసారి క్షుణ్నంగా అడిట్ నిర్వహించాలని ఆదేశించింది పేటీఎం.
"కొందరు సంస్థ ఉద్యోగులు, చిన్న వ్యాపారులు థర్డ్ పార్టీ కంపెనీలతో కుమ్మక్కై నకిలీ ఆర్డర్లను సృష్టించారు. వాటి ద్వారా వచ్చే క్యాష్ బ్యాక్లను వ్యక్తిగత ఖాతాల్లో జమచేసుకున్నారు" అని తేల్చింది ఆడిట్ నిర్వహించిన ఎర్నెస్ట్ అండ్ యంగ్ సంస్థ. ఇలా ఇప్పటి వరకు రూ. 10 కోట్లు వరకు మోసం జరిగి ఉంటుందని నిర్ధరించింది.
ఇకపై ఇలా జరగకుండా కట్టుదిట్టమైన చర్యలు చేపడుతున్నట్లు పేటీఎం తెలిపింది.
