ఐటీ రంగంలో పనిచేయాలనే ఆశావహులకు శుభవార్త. ప్రముఖ ఐటీ సంస్థ హెచ్సీఎల్ టెక్నాలజీస్ కొత్తగా 20,000 నుంచి 22,000 ఉద్యోగాలు ఇవ్వనున్నట్లు ప్రకటించింది. ఈ ఉద్యోగాలు ఫ్రెషర్స్కే ఇవ్వనున్నట్లు పేర్కొంది. గతేడాదితో పోల్చితే.. 21-2022లో 50 శాతం ఎక్కువగా ఉద్యోగాలిస్తుండటం గమనార్హం.
జులై 19న సంస్థ హ్యూమన్ రిసోర్సెస్ ఛీఫ్ వీవీ అప్పారావు ఉద్యోగావకాశాలపై ప్రకటన చేశారు. 'గతేడాది 14,600 మంది ఫ్రెషర్లకు ఉద్యోగాలిచ్చాం. ఈ ఏడాది 20-22 వేల మందికి ఉద్యోగావకాశాలు కల్పించనున్నాం. ఈ సంఖ్య పెరిగినా ఆశ్చర్యపోవాల్సిన పనిలేదు,' అని అప్పారావు అన్నారు.
70 శాతం మందికి వ్యాక్సినేషన్...
హెచ్సీఎల్ టెక్ సంస్థ ఇప్పటికే 70శాతం మంది ఉద్యోగులకు వ్యాక్సినేషన్ పూర్తి చేసింది. ఈ త్రైమాసికంలో ఉద్యోగులందరికీ టీకా వేయించనుంది. ప్రస్తుతం 3శాతం ఉద్యోగులు సంస్థలో పనిచేసేందుకు ఆఫీసులకు వెళ్తున్నారు. ఈ సంఖ్య క్రమంగా పెరుగుతోందని హెచ్సీఎల్ టెక్ పేర్కొంది.
