కరోనా సంక్షోభ సమయంలో విదేశాలు భారత్కు అందించిన సాయం వివరాలను కేంద్రం దాస్తోందని కాంగ్రెస్ నేత రాహుల్ గాంధీ ఆరోపించారు. ప్రపంచ దేశాలు భారత్కు పంపిన వైద్య సామగ్రి వివరాల్లో పారదర్శకత ఎందుకు లేదని ధ్వజమెత్తారు. ఈ విషయంపై కేంద్రానికి ట్విట్టర్ వేదికగా పలు ప్రశ్నలు సంధించారు.
- ఇప్పటివరకు భారత్కు విదేశాలు ఏమేం పంపాయి?
- అవన్నీ ఎక్కడున్నాయి?
- వాటి వల్ల ఎవరికి ప్రయోజనం చేకూరుతోంది?
- రాష్ట్రాలకు వాటిని ఏ విధంగా కేటాయిస్తున్నారు?
- పారదర్శకత ఎందుకు లేదు?
ఈ ప్రశ్నలన్నింటికీ కేంద్రం వద్ద సమాధానాలున్నాయా? అని రాహుల్ ట్వీట్ చేశారు.
అంతకుముందు దేశంలో నిరుద్యోగ రేటు గురించి సెంటర్ ఫర్ మానిటరింగ్ ఇండియన్ ఎకానమీ(సీఎంఐఈ) డేటాను ఆధారంగా చూపుతూ భాజపా ప్రభుత్వంపై విమర్శలు గుప్పించారు రాహుల్. కరోనాపై పోరులో కేంద్రం విఫలమైందని దుయ్యబట్టారు.
" దేశంలో వ్యాక్సిన్లు లేవు, ఉపాధి లేదు. కరోనా కారణంగా ప్రజలు తీవ్ర ఇబ్బందులు ఎదుర్కొంటున్నారు. మోదీ ప్రభుత్వం పూర్తిగా విఫలమైంది" అని హిందీలో ట్వీట్ చేశారు.
ఇదీ చూడండి: కరోనా వార్డుకు నో- నారింజ తోటలోనే చికిత్సకు మొగ్గు!
