Constable shot dead: జమ్ముకశ్మీర్లో ఉగ్రవాదులు మరోసారి రెచ్చిపోయారు. శ్రీనగర్లోని సౌరా ప్రాంతంలో ఓ కానిస్టేబుల్పై తూటాల వర్షం కురిపించారు. అతని ఏడేళ్ల కుమార్తెపైనా కాల్పులకు తెగబడ్డారు. తీవ్రగాయాలపాలైన వీరిని ఆస్పత్రికి తరలించగా.. కానిస్టేబుల్ అప్పటికే మరణించినట్లు వైద్యులు తెలిపారు. కుడి చేతికి బుల్లెట్ గాయమైన అతని కుమార్తెకు చికిత్స అందిస్తున్నట్లు చెప్పారు.
మంగళవారం సాయంత్రం 5 గంటల సమయంలో ఈ ఘటన జరిగినట్లు అధికారులు వెల్లడించారు. మృతి చెందిన కానిస్టేబుల్ను సౌరాలోని మాలిక్ సాహిబ్ ప్రాంతానికి చెందిన సైఫుల్లా ఖాద్రిగా గుర్తించినట్లు చెప్పారు. కూతుర్ని ట్యూషన్ నుంచి తీసుకెళ్లి ఇంటివద్ద డ్రాప్ చేస్తుండగా.. ఉగ్రవాదులు దాడి చేసినట్లు వివరించారు.
కానిస్టేబుల్ కుమార్తె పరిస్థితి నిలకడగానే ఉన్నట్లు అధికారులు చెప్పారు. ఘటనపై కేసు నమోదు చేసి నిందితుల కోసం గాలింపు చేపట్టినట్లు పేర్కొన్నారు. ఖాద్రి మృతితో కశ్మీర్లో నెల వ్యవధిలో ముగ్గురు పోలీసులు ప్రాణాలు కోల్పోయినట్లయింది. వీరంతా ఉగ్రవాదుల దాడిలోనే మరణించారు. మే 7న ఐవా వంతెనపై ఓ పోలీస్ను ఉగ్రవాదులు కాల్చి చంపారు. ఆ తర్వాత మే 13న పుల్వామాలో మరో పోలీస్పై దాడి చేసి హత్య చేశారు.
ఇదీ చదవండి: ప్రపంచ రికార్డ్.. 11కి.మీ పొడవైన వస్త్రం.. అమ్మవారికి సమర్పించిన సీఎం
