వేల కోట్ల రూపాయల అప్పును ఎగవేసి.. విదేశాలకు వెళ్లిపోతున్న వారి గురించి రోజూ పత్రికల్లో చూస్తూనే ఉన్నాము. అలాంటి ఈ కాలంలో.. రూ. 28 అప్పును చెల్లించడం కోసం విదేశాల నుంచి భారత్కు వచ్చారు ఓ వ్యక్తి. 68 ఏళ్ల తర్వాత అప్పును వడ్డీతో సహా తీర్చేశారు. హరియాణా హిసార్లో జరిగింది ఈ ఘటన.
అమెరికా టు ఇండియా..
బీఎస్ ఉప్పల్ బాల్యం అంతా హిసార్లోనే గడిచింది. అక్కడే ఉన్న హర్జిరామ్ హిందూ పాఠశాలలో ఆయన 10వ తరగతి పూర్తి చేసుకున్నారు. ఆయన ఇంటి దగ్గర 'దిల్లీ వాలా హల్వాయి' అనే దుకాణం ఉండేది. అక్కడ ఎప్పుడూ లస్సీ తాగేవారు. 1954లో ఒకసారి అత్యవసరంగా హిసార్ను వీడాల్సి వచ్చింది. అప్పటికే ఆ దుకాణ యజమానికి బీఎస్ ఉప్పల్.. రూ.28 అప్పు ఉన్నారు. ఊరు మారినా ఆ విషయాన్ని ఆయన మర్చిపోలేదు. ఆ తర్వాత ఆయన నేవీలో చేరారు. హిసార్కు తిరిగి వెళ్లడం కుదరలేదు. ఇక రిటైర్మంట్ తర్వాత కుమారుడితో కలిసి బీఎస్ ఉప్పల్.. అమెరికాలో స్థిరపడ్డారు.
ఉప్పల్ ఏం చేస్తున్నా, ఎక్కడున్నా.. అప్పు తిరిగి ఇవ్వడం గురించే ఆయన ఆలోచించేవారు. చివరకు.. ఎలాగైనా అప్పు తిరిగి ఇవ్వాలని నిర్ణయించుకున్నారు. భారత్కు వచ్చారు. హిసార్కు వెళ్లి ఆ దుకాణం యజమానిని కలిశారు. 'నేను మీ తాతకు 28 రూపాయలు అప్పు ఉన్నాను. అది తిరిగి ఇవ్వడానికే ఇక్కడకు వచ్చాను' అని చెప్పారు. అప్పును వడ్డీతో సహా తీర్చేశారు బీఎస్ ఉప్పల్. దుకాణ యజమానికి రూ. 10వేలు ఇచ్చారు.
ఆ తర్వాత బీఎస్ ఉప్పల్ తాను చదువుకున్న స్కూలుకు వెళ్లారు. అది మూతపడి ఉండటం వల్ల నిరాశ చెందారు.
భారత్-పాకిస్థాన్ యుద్ధం సమయంలో నేవీ కమాండర్గా పనిచేశారు బీఎస్ ఉప్పల్. శత్రు దేశ జలాంతర్గామిని పడగొట్టి.. దేశానికి సురక్షితంగా తిరిగొచ్చారు. ఆయన ధైర్యసాహసాలను గుర్తించిన ప్రభుత్వం.. 'నేవీ అవార్డ్ ఫర్ బ్రేవరీ'తో సత్కరించింది.
ఇదీ చూడండి:- కొబ్బరికాయ కొడితే కొత్త రోడ్డుకు పగుళ్లు- ధర్నాకు దిగిన ఎమ్మెల్యే
