కోర్టు ఆవరణలోనే భార్య గొంతు కోసి దారుణ హత్య

Man Slits Wife Throat: కర్ణాటక హసన్​ జిల్లాలో దారుణ ఘటన జరిగింది. కోర్టు ఆవరణలోనే భార్య గొంతు కోసి చంపాడు ఓ వ్యక్తి. హోళెనరసీపుర టౌన్​ కోర్టు ప్రాంగణంలో.. శనివారం ఈ ఘటన జరిగినట్లు పోలీసులు తెలిపారు. మృతురాలిని తట్టెకెరె గ్రామానికి చెందిన ఛైత్రగా గుర్తించారు. నిందితుడు శివకుమార్​ను పోలీసులు అరెస్టు చేశారు.

నిందితుడు

పోలీసుల వివరాల ప్రకారం.. ఐదేళ్ల క్రితం శివకుమార్​కు ఛైత్రతో వివాహమైంది. దంపతుల మధ్య రెండేళ్ల కింద విభేదాలు రావడంతో.. దూరంగా ఉంటున్నారు. అప్పుడే విడాకులకు దరఖాస్తు చేసి భరణం చెల్లించాలని మహిళ కోర్టును ఆశ్రయించింది. కొద్దిరోజులుగా ఈ కేసు నడుస్తోంది. ఈ క్రమంలోనే శనివారం ఛైత్ర.. కోర్టుకు హాజరవుతున్న సమయంలో ఆమెను అనుసరించిన భర్త శివకుమార్​ కత్తి గొంతు కోశాడు. అనంతరం పరారయ్యేందుకు ప్రయత్నించగా పోలీసులు ఛేజ్​ చేసి అతడిని అదుపులోకి తీసుకున్నారు. బాధితురాలిని హుటాహుటిన హోళెనరసీపుర ఆస్పత్రికి తరలించారు. చికిత్స పొందుతూ ప్రాణాలు కోల్పోయింది. ఘటనపై పోలీసులు దర్యాప్తు చేస్తున్నారు.

ఇవీ చూడండి: పనిచేసే బ్యాంకుకే కన్నం 20 కోట్ల విలువైన బంగారం చోరీ