దేశంలో మరో కొత్త వ్యాధి- ఒకేసారి నాలుగు కేసులు

ఇప్పటికే కరోనాతో ప్రజల్లో భయాందోళనలు నెలకొన్న వేళ హిమాచల్​ప్రదేశ్​లో కొత్తగా నలుగురు స్క్రబ్​ టైఫస్​ అనే వ్యాధి బారినపడ్డారు. ఈ విషయాన్ని ఇందిరాగాంధీ వైద్య కళాశాల(ఐజీఎంసీ) ఆస్పత్రి డా. జనక్ రాజ్ మంగళవారం వెల్లడించారు. స్క్రబ్ టైఫస్ సోకిన చిగ్గర్స్ (లార్వా పురుగులు) కాటు ద్వారా ప్రజలకు ఈ వ్యాధి వ్యాపిస్తుంది.

చిగ్గర్ కుడితే వచ్చే దద్దుర్లు

స్క్రబ్ టైఫస్ అంటే?

స్క్రబ్ టైఫస్​ను బుష్ టైఫస్​ అని కూడా అంటారు. ఓరియెన్​షియా సుసుగాముషి అనే బ్యాక్టీరియా ద్వారా ఈ వ్యాధి కలుగుతుంది. ఈశాన్య ఆసియా, ఇండోనేషియా, చైనా, జపాన్, భారత్, ఉత్తర ఆస్ట్రేలియాల్లో ఇది ఎక్కువగా వ్యాపిస్తోంది.

లక్షణాలు..

చిగ్గర్ కాటు

స్క్రబ్ టైఫస్ లక్షణాలు కూడా ఎన్నో ఇతర రోగాల లక్షణాలకు దగ్గరగా ఉంటాయి. పురుగు కుట్టిన 10 రోజుల్లో ఈ వ్యాధికి సంబంధించిన లక్షణాలు బయటపడుతుంటాయి. అవి..

• జ్వరం, చలి జ్వరం
• తల నొప్పి
• ఒళ్లు, కండరాల నొప్పులు
• పురుగు కుట్టిన చోట నల్లటిమచ్చ
• మానసిక మార్పులు (భ్రమ నుంచి కోమా వరకు)
• ఒంటిపై ఎర్రటి దద్దుర్లు
• తీవ్ర అనారోగ్యంతో ఉన్నవారికి అవయవాల వైఫల్యం, రక్తస్రావం జరిగి చికిత్స అందించకపోతే ప్రాణాంతకంగా మారే ప్రమాదం ఉంది.
  

  గోటిపై చిగ్గర్

చికిత్స ఎలా?

పై లక్షణాలు కనపడినా, ఈ వ్యాధి ప్రబలిన ప్రాంతాల్లో సంచరించినా ఆ సమాచారం వైద్యులకు వెల్లడించాలి. వైద్యులు.. రక్త పరీక్షలు చేయవచ్చు. టెస్టు రిపోర్టులు రావడానికి వారాల సమయం పడుతుంది. కాబట్టి అంతకన్నా ముందే చికిత్స ప్రారంభించే అవకాశం ఉంది.

ఈ చికిత్సలో డోక్సిసైక్లిన్ అనే యాంటీబయోటిక్ వాడతారు. అది అన్ని వయసుల వారికీ ఇవ్వొచ్చు. లక్షణాలు కనబడిన వెంటనే ఇది ఇస్తే త్వరగా కోలుకునే అవకాశం ఉంటుంది.

సూది తల భాగంలో చిగ్గర్

నివారణ ఎలా?

స్క్రబ్​ టైఫస్ నివారణకు టీకా లేదు. వ్యాధి సోకిన చిగ్గర్స్​కు దూరంగా ఉండటం వల్ల దాని నుంచి తప్పించుకోవచ్చు. చిగ్గర్స్​ ఎక్కువగా ఉండే దట్టంగా ఉన్న పొదలు, అడువులకు వెళ్లకుండా ఉంటే మేలు.

ఒక వేళ మీరు బయట ఎక్కువగా తిరుగుతున్నట్లు అయితే..

• డీఈఈటీ లాంటి శక్తివంతమైన పదార్థాలు కలిగిన కీటక నాశిని(ఇన్​సెక్ట్​ రిపెల్లంట్​) ద్రవాలను చిగ్గర్స్​పై పిచికారీ చేయాలి.
• చర్మానికి రాసుకునేవాటిని సూచనల ఆధారంగా వాడాలి.
• సన్​స్క్రీన్​ లోషన్​ లాంటివి పెట్టుకున్న తర్వాతే ఇన్​సెక్ట్​ రిపెల్లంట్​లను పూసుకోవాలి.

చిన్నపిల్లలుంటే..

• చేతులు, కాళ్లు పూర్తిగా కప్పి ఉంచే బట్టలు వేయాలి. ఉయ్యాలలో ఉంటే దోమ తెరలు వాడాలి.
• చిన్నారుల చేతులు, కళ్లు, నోరు, శరీరంపై పగుళ్లు, చర్మ సమస్యలుంటే రిపెల్లంట్​లను నేరుగా పూయొద్దు.
• పెద్దలైతే ఇన్​సెక్ట్​ రిపెల్లంట్​ను ముందుగా చేతుల్లో స్ప్రే చేసిన తర్వాత మొహానికి రాసుకోవాలి.

పెరిమిత్రిన్..

పెరిమిత్రిన్.. చిగ్గర్స్​ను చంపుతుంది. బూట్లు, బట్టలపై దానిని పిచికారీ చేస్తే పురుగులు రాకుండా ఉంటాయి. పెరిమిత్రిన్​ను నేరుగా చర్మంపై వాడకండి.

ఇదీ చూడండి: అది..డెంగీ కాదు.. మలేరియా కాదు.. కానీ డేంజర్!