Chandigarh Airport Rename : కేంద్రపాలిత ప్రాంతం చండీగఢ్లోని ఎయిర్పోర్టు పేరు.. ఇకపై షహీద్ భగత్సింగ్ విమానాశ్రయంగా మారనుంది. ఆదివారం మన్ కీ బాత్ కార్యక్రమంలో మాట్లాడిన ప్రధానమంత్రి నరేంద్ర మోదీ ఈ నిర్ణయాన్ని ప్రకటించారు. సెప్టెంబర్ 28న ఆయన జయంతి నేపథ్యంలో.. ఆ స్వాతంత్ర్య సమరయోధుడికి నివాళిగా ఈ నిర్ణయం తీసుకున్నామన్నారు.
దశాబ్దాల తర్వాత చీతాలు తిరిగి భారత్లో అడుగుపెట్టడం 130 కోట్ల భారతీయులకు గర్వకారణమన్నారు. ప్రస్తుతం చీతాలు టాస్క్ఫోర్స్ పర్యవేక్షణలో ఉన్నాయని.. త్వరలోనే వాటిని చూసేందుకు ప్రజలకు అనుమతిస్తామని చెప్పారు. చీతాలకు కొత్త పేర్లు సూచించాలని ప్రజలను కోరారు. అలాగే జంతువుల పట్ల మనుషులు ఎలా ప్రవర్తించాలనే విషయంపైనా సూచనలు ఇవ్వాలని విజ్ఞప్తి చేశారు. ఈ పోటీలో పాల్గొన్నవారికి మొదట చీతాలను చూసే అవకాశం కల్పిస్తామని చెప్పారు.
వాతావరణ మార్పులతో సముద్ర పర్యావరణ వ్యవస్థలు దెబ్బతింటున్నాయని ఆవేదన వ్యక్తం చేశారు. ఈ సవాళ్లను పరిష్కరించడానికి మనమంతా కృషిచేయాలని విజ్ఞప్తి చేశారు. మరోవైపు భారతీయ జనతా పార్టీ సిద్ధాంతకర్త దీన్ దయాళ్ ఉపాధ్యాయ జయంతి సందర్భంగా ఆయన్ను స్మరించుకున్నారు. ఆయన ఉన్నతమైన ఆలోచనలు కలవారని.. భరతమాత ముద్దుబిడ్డ అని కొనియాడారు.
ఇవీ చదవండి: ఆర్ఎస్ఎస్ కార్యకర్త ఇంటిపై పెట్రోల్ బాంబ్ దాడి.. సీసీటీవీ దృశ్యాలు వైరల్
'విదేశాల్లో ఉద్యోగ ఆఫర్లు'.. గుడ్డిగా నమ్మితే అంతే సంగతి.. కేంద్రం హెచ్చరిక!
