బాంబే హైకోర్టు ఉత్తర్వులను సవాల్ చేస్తూ రిపబ్లిక్ టీవీ ఎడిటర్ ఇన్ చీఫ్ అర్ణబ్ గోస్వామి దాఖలు చేసిన పిటిషన్ను నేడు పరిశీలించనుంది సుప్రీం కోర్టు. 2018లో ఓ ఇంటీరియర్‌ డిజైనర్, అతని తల్లి ఆత్మహత్య కేసులో పోలీసులు అర్ణబ్ను అరెస్టు చేశారు. దీనిపై అర్ణబ్ దాఖలు చేసిన బెయిల్ పిటిషన్ను హైకోర్టు తిరస్కరించగా.. ఆయన అత్యున్నత న్యాయస్థానాన్ని ఆశ్రయించారు.
ఈ కేసులో అర్ణబ్‌‌తో పాటు మరో ఇద్దరిని అలీబాగ్‌ పోలీసులు నవంబర్‌ 4న అరెస్ట్ చేశారు.
అర్ణబ్ తాజాగా దాఖలు చేసిన బెయిల్ పిటిషన్లో కేంద్ర, రాష్ట్ర ప్రభుత్వాలతో పాటు ముంబయి పోలీసులను ప్రతివాదులుగా చేర్చారు. ఇలా ఉంటే బాంబే హైకోర్టు సూచన మేరకు కింది న్యాయస్థానం అయిన రాయ్‌గఢ్ సెషన్స్ కోర్టులో కూడా బెయిల్ దాఖలు చేశారు.
మహా సర్కారు అలా..
మరోవైపు మహారాష్ట్ర ప్రభుత్వం ఈ కేసుకు సంబంధించి సుప్రీంకోర్టులో కేవియట్ పిటిషన్ దాఖలు చేసింది. తమ వాదన వినకుండా అర్ణబ్ బెయిల్ అభ్యర్థనపై నిర్ణయం తీసుకోరాదని విన్నవించింది. కాగా బెయిల్ కోసం సెషన్స్ కోర్టులో అర్ణబ్ వేసిన పిటిషన్పైనా మంగళవారం విచారణ జరిగింది.
