రాజస్థాన్లో అసంతృప్తి నేత సచిన్ పైలట్ వర్గం సొంత గూటికి చేరడం వల్ల రాజకీయ సంక్షోభానికి తెరపడింది. ఈ నేపథ్యంలో పార్టీని ఉద్దేశించి కీలక వ్యాఖ్యలు చేశారు ముఖ్యమంత్రి అశోక్ గహ్లోత్. కాంగ్రెస్లో నెలకొన్న అపార్థాలను విడనాడి ముందుకు సాగాలని పిలుపునిచ్చారు. ప్రజాస్వామ్యాన్ని కాపాడేందుకు పోరాడాలని ట్వీట్ చేశారు.
" దేశం, రాష్ట్రం, ప్రజలు, ప్రజాస్వామ్య ప్రయోజనాల కోసం గత నెల రోజులుగా పార్టీలో నెలకొన్న ఎలాంటి అపార్థాలనైనా వదిలేయాల్సిన అవసరం ఉంది. క్షమాగుణంతో ప్రజాస్వామ్యాన్ని కాపాడే పోరాటంలో మన శక్తులన్నింటినీ ధారపోయాలి. అన్నింటినీ వదిలేసి ముందుకు సాగాలి. ప్రజాస్వామ్యాన్ని అణచివేసే ప్రమాదకరమైన ఆట ప్రస్తుతం దేశంలో కొనసాగుతోంది. కర్ణాటక, మధ్యప్రదేశ్, అరుణాచల్ప్రదేశ్ సహా ఇతర రాష్ట్రాల్లో జరిగినట్లు దేశంలోని ప్రత్యర్థి పార్టీల ప్రభుత్వాలను ఒకదాని వెనక ఒకటి కూలదోసేందుకు కుట్ర జరుగుతోంది. పార్టీ అధ్యక్షులు సోనియా, రాహుల్ గాంధీల నాయకత్వంలో కాంగ్రెస్.. ప్రజాస్వామ్యాన్ని కాపాడేందుకు పోరాటం చేస్తోంది."
- అశోక్ గహ్లోత్, రాజస్థాన్ ముఖ్యమంత్రి
ఈనెల 14న అసెంబ్లీ సమావేశాలు ప్రారంభంకానున్న నేపథ్యంలో ఆలోపు తిరుగుబాటు ఎమ్మెల్యేలు జైపుర్ చేరుకుంటారని కాంగ్రెస్ వర్గాలు తెలిపాయి. అలాగే గహ్లోత్ వర్గం ఎమ్మెల్యేలు జైసల్మీర్ నుంచి జైపుర్కు బుధవారమే చేరుకున్నారు. వారందరిని విమానాశ్రయం నుంచి నేరుగా ఫేయిర్మౌెంట్ హోటల్కు తరలించారు. అసెంబ్లీ సమావేశాల వరకు వారు అక్కడే ఉండే అవకాశాలు ఉన్నాయి.
ఇదీ చూడండి: పైలట్ తిరిగొచ్చినా యథావిధిగా బలపరీక్ష!
