వాట్సాప్లో ఉచితంగా క్రెడిట్ స్కోరు చూసుకునే ఫీచర్ దేశంలోని వినియోగదారులకు అందుబాటులోకి వచ్చింది. ఎక్స్పీరియన్ అనే డేటా అనలిటిక్స్ కంపెనీ.. వాట్సాప్ యూజర్స్కు ఫ్రీగా క్రెడిట్ స్కోరు అందిస్తోంది. సెకన్ల వ్యవధిలో వాట్సాప్ యూజర్లు తమ క్రెడిట్ స్కోరు చూసుకోవచ్చు. స్కోరులో ఏవైనా అవకతవకలు ఉన్నట్లు అనిపిస్తే వెంటనే సరిచేసుకోవచ్చు. మెసేజింగ్ యాప్ ద్వారా ఇలాంటి సేవలు ప్రారంభించిన తొలి కంపెనీ ఎక్స్పీరియనే కావడం విశేషం. గణాంకాల ప్రకారం వాట్సాప్కు భారత్లో 48.75 కోట్ల మంది యూజర్లు ఉన్నారు. ఉచితంగా వివరాలను అందించడం ద్వారా.. వీరికి క్రెడిట్ స్కోరుపై అవగాహన పెంచవచ్చని ఎక్స్పీరియన్ భావిస్తోంది.
ఉచితంగా క్రెడిట్ స్కోరు ఎలా చెక్ చేసుకోవాలంటే?
- ముందుగా, వాట్సాప్లో 'Hey' అని టైప్ చేసి +919920035444 నెంబర్కు మెసేజ్ పంపించాలి.
- నంబర్ సేవ్ చేసుకోవడానికి బదులు ఈ లింక్పై https://wa.me/message/LBKHANJQNOUKF1 క్లిక్ చేసినా వాట్సాప్ ఎక్స్పీరియన్ చాట్ విండో ఓపెన్ అవుతుంది.
- ఎక్స్పీరియన్ చాట్ విండోలో మీ వివరాలు టైప్ చేయాలి.
- ధ్రువపత్రాల్లో ఉన్న విధంగా పేరు నమోదు చేయాలి.
- అనంతరం, ఈమెయిల్ అడ్రెస్ను ఇవ్వాలి.
- ఆ తర్వాత ఫోన్ నెంబర్ ఎంటర్ చేయాలి.
- ఈ వివరాలు నమోదు చేసిన తర్వాత ఫోన్ నెంబర్కు ఓటీపీ వస్తుంది. దాన్ని ఎంటర్ చేస్తే.. వెంటనే మన క్రెడిట్ స్కోరు వివరాలు వాట్సాప్ చాట్లోకి వచ్చేస్తాయి.
ఎక్కువైతే.. మ్యూట్ చేసేస్తుంది!
వాట్సాప్లో నోటిఫికేషన్ ఓవర్లోడ్ సమస్యను తగ్గించేందుకు సంస్థ ప్రయత్నాలు చేస్తోంది. గ్రూపులలో 256 కన్నా ఎక్కువ మంది సభ్యులు ఉంటే.. ఆటోమెటిక్గా నోటిఫికేషన్స్ మ్యూట్ అయ్యేలా కొత్త పద్ధతిని పరీక్షిస్తోంది. గ్రూప్లో సభ్యుల గరిష్ఠ సంఖ్యను 256 నుంచి 1,024కు పెంచిన నేపథ్యంలో ఈ కొత్త ఫీచర్ను ప్రవేశపెట్టనున్నట్లు తెలుస్తోంది. వాట్సాప్ బీటా వెర్షన్ 2.22.23.9లో ఈ ఫీచర్ అందుబాటులోకి వచ్చిందని సమాచారం. ఏదైనా గ్రూప్లో సభ్యుల సంఖ్య 257కు చేరితే.. వెంటనే ఆ గ్రూప్ నోటిఫికేషన్లు డీఫాల్ట్గా మ్యూట్ అయిపోతాయి. నోటిఫికేషన్లు ముందులా రావాలని కోరుకుంటే.. యూజర్లు మ్యానువల్గా సెట్టింగ్స్ మార్చుకోవాల్సి ఉంటుంది.
