కర్ణాటక బెంగళూరులో దారుణ ఘటన వెలుగులోకి వచ్చింది. నలుగురు దుండగులు.. ఓ వ్యక్తిని అతని ఇద్దరి కుమార్తెల ముందే కిరాతకంగా హత్య చేశారు. ఈ ఘటన స్థానికంగా కలకలం సృష్టించింది.
గాంధీ కృషి విజ్ఞాన కేంద్రలో సెక్యూరిటీ గార్డుగా పనిచేస్తున్న 46ఏళ్ల దీపక్ కుమార్ అనే వ్యక్తి.. తన భార్య, ఇద్దరు కూతుళ్లతో వీర్ సాగర్ రోడ్డులోని ఓ అద్దె ఇంట్లో నివాసముంటున్నాడు. దీపక్ కుటుంబం బిహార్ నుంచి వచ్చి ఇక్కడ స్థిరపడింది. కొద్ది రోజుల క్రితం దీపక్ భార్య బిహార్కు వెళ్లింది. సోమవారం అర్ధరాత్రి.. నలుగురు దుండగులు దీపక్ ఇంట్లో చొరబడి ఆయుధాలతో అతడిని చంపేశారు. ఇదంతా దీపక్ కుమార్తెల కళ్ల ముందే జరిగింది. ఘటనపై సమాచారం అందుకున్న పోలీసులు.. అక్కడకు చేరుకుని మృతదేహాన్ని స్వాధీనం చేసుకున్నారు.
నిందితులెవరు?
ఏడాదిన్నర కాలంగా.. దీపక్ తన కూతుళ్లను లైంగికంగా వేధిస్తున్నట్టు తెలుస్తోంది. ఈ విషయాన్ని వారు తల్లికి వివరించారు. ఈ వ్యవహారంపైనే దంపతులు తరచూ గొడవపడుతూ ఉండేవారు. హత్య జరిగిన రోజు రాత్రి కూడా.. దీపక్ తాగేసి వచ్చి కుమార్తెలను చిత్రహింసలు పెట్టాడు.
కొద్ది రోజుల క్రితం తండ్రి గురించి తోటి కాలేజీ మిత్రులతో పిల్లలు పలు విషయాలు చెప్పినట్లు తెలుస్తోంది. హత్య వెనుక వారి మిత్రులు ఉన్నట్టు అనుమానాలు వ్యక్తమవుతున్నాయి.
ఈ ఘటనపై యెలహంక న్యూటౌన్ పోలీసులు కేసు నమోదు చేసుకుని దర్యాప్తు చేస్తున్నట్లు తెలిపారు. ఈ నేపథ్యంలో మాట్లాడిన డీసీపీ సీకే బాబా.. 'హత్యకు గల కారణాలు ఇంకా తెలియలేదు. విచారణ కోసం రెండు ప్రత్యేక బృందాలను ఏర్పాటు చేశాం. నిందితుల గురించి సమాచారం అందింది. అతి త్వరలోనే అరెస్టు చేస్తాం' అని పేర్కొన్నారు.
ఇదీ చూడండి: వర్ష బీభత్సానికి 24 మంది బలి- 5 లక్షల ఎకరాల పంట నష్టం
