UP Cabinet Expansion : వచ్చే సార్వత్రిక ఎన్నికల్లో 370 సీట్లు గెలవడమే లక్ష్యంగా పెట్టుకున్న భారతీయ జనతా పార్టీ, అందుకోసం పక్కాగా వ్యూహాలు రచిస్తోంది. ఈ నేపథ్యంలోనే దేశంలోనే అతిపెద్ద రాష్ట్రం, అత్యధిక లోక్సభ స్థానాలు కలిగిన ఉత్తర్ప్రదేశ్పై ప్రత్యేక దృష్టి పెట్టింది. అక్కడ ఉన్న 80 స్థానాలను క్లీన్ స్వీప్ చేయాలనే లక్ష్యంగా పావులు కదుపుతోంది. టార్గెట్ 80 లక్ష్యంగానే రాష్ట్ర మంత్రివర్గాన్ని పునర్ వ్యవస్థీకరించినట్లు కనిపిస్తోంది. అంతకుముందు దూరం పెట్టిన నేతలను సైతం అక్కున చేర్చుకుని కేబినెట్లోకి తీసుకుంది. రాష్ట్రంలో కీలక పార్టీ అయిన అర్ఎల్డీతో ఇటీవలె పొత్తు పెట్టుకున్న బీజేపీ, అంతకుముందు కేబినెట్ను నుంచి తొలగించిన ఎస్బీఎస్పీ అధ్యక్షుడు ఓం ప్రకాశ్ రాజ్భర్ను సైతం తిరిగి మంత్రివర్గంలోకి తీసుకుంది.
బీజేపీకి చెందిన ఇద్దరు నేతలతో పాటు ఆర్ఎల్డీ, ఎస్బీఎస్పీకి చెందిన చెరొకరిని మంత్రివర్గంలోకి తీసుకుంది. ఓం ప్రకాశ్ రాజ్భర్తో పాటు ఆర్ఎల్డీకి చెందిన అనిల్ కుమార్, బీజేపీకి చెందిన దారా సింగ్ చౌహాన్, సునీల్ కుమార్ మిశ్రా ఉన్నారు. గవర్నర్ ఆనందీబెన్ పటేల్ మంగళవారం లఖ్నవూలో వీరితో ప్రమాణ స్వీకారం చేయించారు. రాజ్భవన్లో జరిగిన ఈ కార్యక్రమానికి ముఖ్యమంత్రి యోగి ఆదిత్యనాథ్ హాజరయ్యారు.
"మా పార్టీ అధ్యక్షుడు జయంత్ చౌధరీ, సీఎం యోగి ఆదిత్యనాథ్, ప్రధాని మోదీకి ధన్యవాదాలు. నాకు అప్పగించిన ఈ బాధ్యతను నిజాయితీగా నిర్వర్తిస్తాను. రాష్ట్రంలో 80 లోక్సభ స్థానాల్లో గెలుపే లక్ష్యంగా పనిచేస్తాం. ప్రధాని మోదీ పెట్టిన 400 సీట్ల లక్ష్యాన్ని నెరవేరుస్తాం."
--అనిల్ కుమార్, మంత్రి
"పట్టుదలతో పనిచేసి రాష్ట్రంలో 80 సీట్లు గెలుచుకుంటాం. దేశవ్యాప్తంగా 400కు పైగా సీట్లు గెలిచి మోదీ వరుసగా మూడోసారి ప్రధానమంత్రి అవుతారు."
--దారా సింగ్, మంత్రి
ఆ వర్గాల ఓటర్లే టార్గెట్
సామాజిక సమీకరణాలను సైతం దృష్టిలో పెట్టుకుని మంత్రివర్గాన్ని పునర్ వ్యవస్థీకరించింది బీజేపీ. ఓం ప్రకాశ్ రాజ్భర్, దారా సింగ్ చౌహాన్ ఓబీసి వర్గానికి చెందిన వారు కాగా, అనిల్ కుమార్ ఎస్సీ, సునీల్ కుమార్ శర్మ బ్రహ్మణ వర్గానికి చెందినవారు. వీరిని మంత్రివర్గంలోకి తీసుకున్న బీజేపీ ఆయా వర్గాల ఓటర్లను ప్రసన్నం చేసుకోవచ్చని ఆశిస్తోంది.
ఆ పార్టీల చేరికతో ఎన్డీఏకు మరింత బలం
జయంత్ చౌధరీ నేతృత్వంలోని రాష్ట్రీయ లోక్దళ్ (ఆర్ఎల్డీ) ఇటీవలె ఎన్డీఏలో చేరింది. చౌధరీ పార్టీ ప్రధాన ఓటు బ్యాంకు జాట్ వర్గమే. ఉత్తర్ప్రదేశ్లోని ముజఫర్‌నగర్, కైరానా, బిజ్నౌర్, మథుర, బాగ్‌పత్, అమ్రోహా, మేరఠ్‌లో ఈ వర్గం ప్రాబల్యం ఎక్కువ. ఆర్ఎల్డీ పార్టీ చేరికతో ఈ వర్గం ఓట్లు సైతం ఎన్డీఏకు మళ్లే అవకాశం ఉంది. ఇటీవలె మాజీ ప్రధాని చౌధరీ చరణ్ సింగ్‌కు భారత రత్న ప్రకటించి ఆయన అభిమానులను ఆకట్టుకునే ప్రయత్నం చేసింది. ఓం ప్రకాశ్ రాజ్భర్ నేతృత్వంలోని సుహెల్దేవ్ భారతీయ సమాజ్ పార్టీ గతేడాది జులైలో ఎన్డీఏలో చేరింది. ప్రస్తుతం ఈ పార్టీకి ఆరుగురు ఎమ్మెల్యేలు ఉన్నారు. వీరిద్దరి చేరికతో ఉత్తర్ప్రదేశ్లో ఎన్డీఏకు మరింత బలం చేకూరినట్లైంది.
195మందితో తొలి జాబితా
ఇటీవలె 195 మందితో కూడిన తొలి అభ్యర్థుల జాబితాను విడుదల చేసింది బీజేపీ. ప్రధాన మంత్రి నరేంద్ర మోదీ వరుసగా మూడోసారి వారణాసి నుంచి బరిలోకి దిగనున్నారు. అమిత్‌ షా, రాజ్‌నాథ్‌ సింగ్, స్మృతీ ఇరానీ సహా 34 మంది కేంద్రమంత్రుల పేర్లను తొలి జాబితాలోనే ప్రకటించారు. ఇందులో ఇద్దరు మాజీ మంత్రులు, లోక్సభ స్పీకర్‌ ఓం బిర్లా, మధ్యప్రదేశ్‌ మాజీ ముఖ్యమంత్రి శివరాజ్‌సింగ్‌ చౌహాన్‌కు స్థానం కల్పించారు.
'టార్గెట్ 400'- గెలుపు గుర్రాలపై బీజేపీ ఫోకస్- ఫస్ట్ లిస్ట్లోనే మోదీ, షా పేర్లు!
బీజేపీ మిషన్ 'జ్ఞాన్'తో '400'కు తగ్గేదేలే! మోదీ, షాతో పాటు ఆ ఇద్దరు కూడా రంగంలోకి!
