விருதுநகர் மாவட்டம் சிவகாசி அருகேவுள்ள சுக்கிரவாரபட்டி பகுதியில் ரவிச்சந்திரன் என்பவரது அட்டை மில் செயல்பட்டுவருகிறது. இங்கு வெளிநாடுகளிலிருந்து பழைய காகித பேப்பர்கள் பெறப்பட்டு தரம் பிரித்து, புதுப்பிக்கும் பணிகள் நடைபெறுவது வழக்கம்.
ஐந்துக்கும் மேற்பட்ட இயந்திரங்கள் மூலம் இந்தப் பணிகள் நடைபெற்றுவந்தது. இந்நிலையில், இன்று மாலை ஒரு இயந்திரத்தில் திடீரென தீவிபத்து ஏற்பட்டது. தொடர்ந்து எரிந்த தீ மளமளவென மில் முழுவதும் பரவியது. இந்தப் பயங்கர தீ விபத்தினால் பணி முடித்து தயார் நிலையில் வைக்கப்பட்டிருந்த பொருள்கள் அனைத்தும் தீயில் சேதமாகின. தீயை அணைக்க விருதுநகர், சிவகாசி, சாத்தூர், ஸ்ரீவில்லிபுத்தூர் உள்ளிட்ட தீயணைப்பு நிலையங்களிலிருந்து சுமார் பத்துக்கும் மேற்பட்ட தீயணைப்பு வாகனங்கள் வரவழைக்கப்பட்டன.
சுமார் 300க்கும் மேற்பட்ட பணியாளர்கள் பணிபுரிந்துவரும் இந்த ஆலையில் தீ பற்றியதைப் பார்த்தவுடனேயே அனைத்துத் தொழிலாளர்களும் வெளியேற்றப்பட்டனர். இதனால் உயிர்ச்சேதம் தவிர்க்கப்பட்டது. இருப்பினும், பல லட்சம் மதிப்பிலான பொருள்கள் சேதம் அடைந்திருக்கும் என்று கணக்கிடப்பட்டுள்ளது.
இதையும் படிங்க: டிஎன்பிஎஸ்சி தேர்வை மீண்டும் நடத்த வேண்டும் - டிடிவி தினகரன்!
