சேலம் மாவட்டம் தலைவாசலில் ஒருங்கிணைந்த கால்நடைப் பூங்காவுக்கான அடிக்கல் நாட்டு விழா நடைபெற்றது. இதில் சிறப்பு விருந்தினராகப் பங்கேற்ற தமிழ்நாடு முதலமைச்சர் எடப்பாடி பழனிசாமி விவசாயப் பெருவிழா மற்றும் கண்காட்சியை தொடங்கி வைத்தபோதே இதனைத் தெரிவித்தார்.
இந்த விழாவில் பங்கேற்ற முதலமைச்சர், 'காவிரி டெல்டா மாவட்டங்கள் பாதுகாக்கப்பட்ட சிறப்பு வேளாண் மண்டலமாக மாற்றப்படும். இதுதொடர்பாக சிறப்புச் சட்டம் கொண்டு வரப்படும். விவசாயிகள் படும் துயரத்தை கவனத்தில் கொண்டு இதை நான் அறிவிக்கிறேன். காவிரி டெல்டாவில் மீத்தேன் எரிவாயு எடுப்பதற்கு அனுமதிக்க முடியாது. விவசாயிகளின் வாழ்வாதாரத்தை பாதிக்கும் எந்தத் திட்டத்தையும் தமிழ்நாடு அரசு கொண்டு வராது.
காவிரி டெல்டா பகுதியில் ஹைட்ரோகார்பன் எடுப்பதற்கான அனுமதியை அஇஅதிமுக தரவில்லை. இன்று நாடகமாடும் திமுக தான் அதற்கான ஒப்பந்தத்தைப் போட்டது. இந்த ஒப்பந்தம் மு.க.ஸ்டாலின் முன்னிலையில் கையெழுத்தானது. அஇஅதிமுக தலைமையிலான தமிழ்நாடு அரசைப் பற்றியும், அமைச்சர்களைப் பற்றியும் திமுகவினர் பொய் பரப்புரைகளை செய்து வருகின்றனர். அவர்கள் என்னதான் பரப்புரை செய்தாலும் அஇஅதிமுகவை ஒன்றும் செய்ய முடியாது' எனத் தெரிவித்துக்கொண்டார்.
15 ஆயிரம் பயனாளிகளுக்கு நலத்திட்ட உதவிகளையும் வழங்கிய, இந்த விழாவில் துணை முதலமைச்சர் ஓ.பன்னீர் செல்வம், அமைச்சர் ஜெயக்குமார், உடுமலை ராதாகிருஷ்ணன் உள்ளிட்ட பலர் கலந்து கொண்டனர்.
இதற்கிடையே, தமிழ்நாடு முதலமைச்சரின் இந்த அறிவிப்பு தமிழ்நாட்டின் பல்வேறு தரப்பினர் மத்தியில் பெரும் வரவேற்பைப் பெற்றுள்ளது.
இது தொடர்பாக கருத்து தெரிவித்துள்ள பூவுலகின் நண்பர்கள் அமைப்பின் ஒருங்கிணைப்பாளர் பொறியாளர் சுந்தர்ராஜன், 'போராடும் மக்களை பிரதிநிதித்துவப்படுத்திய மீத்தேன் திட்ட எதிர்ப்புக் கூட்டமைப்பின், நீண்ட நாள் கோரிக்கையான இந்த அறிவிப்பை வெளியிட்ட தமிழ்நாடு முதலமைச்சருக்கு வாழ்த்துகளையும் நன்றியினையும் தெரிவித்துக் கொள்கிறோம். இந்த அறிவிப்பை செயல்படுத்தும் முதல் செயலாக, மீத்தேன் மற்றும் ஹைட்ரோகார்பன் திட்டங்களுக்கு எதிராகப் போராடிய மக்கள் மீது போடப்பட்ட அனைத்து வழக்குகளையும் திரும்பப்பெற கோருகிறோம்' எனத் தெரிவித்தார்.
இதையும் படிங்க : பள்ளி மாணவர்களுக்கு காவல் துறை சார்பில் தற்காப்பு பயிற்சி - திருச்சி டிஐஜி தகவல்!
