புதுக்கோட்டை: நமுணசமுத்திரம் காவல் நிலையம் அருகே புதுக்கோட்டை - மதுரை தேசிய நெடுஞ்சாலையில் புதுக்கோட்டையிலிருந்து சிவகங்கை நோக்கி கார் ஒன்று சென்று கொண்டிருந்தது. இந்த காரில் இரண்டு சிறுவர்கள் ஒரு பெண் உள்பட ஐந்து பேர் பயணம் செய்ததாக கூறப்படுகிறது. அப்போது மதுரையில் இருந்து புதுக்கோட்டை நோக்கி வந்த கொண்டிருந்த தனியார் பேருந்து மீது, கார் நேருக்கு நேர் மோதி விபத்துக்குள்ளானது. இந்த விபத்தில் கார் அப்பளம் போல் நொறுங்கியது.
இது குறித்து அருகில் இருந்த புதுக்கோட்டை மாவட்டம் காவல் நிலையத்திற்கும், தீயணைப்புத் துறைக்கும் தகவல் கொடுக்கப்பட்டது. தகவலறிந்து விரைந்து சென்ற தீயணைப்பு மீட்பு படையினர், நமணசமுத்திரம் காவல் துறையினர் மற்றும் அவசர ஊரதி பணியாளர்கள் ஆகியோர் அரை மணி நேர போராட்டத்திற்கு பிறகு, அவர்களை மீட்டு புதுக்கோட்டை அரசு மருத்துவக் கல்லூரி மருத்துவமனைக்கு சிகிச்சைக்காக அனுப்பி வைத்தனர்.
இதையும் படிங்க: தடுப்பூசியால் 4 மாத குழந்தை உயிரிழப்பு என புகார் - சுகாதாரத்துறை அதிகாரிகள் விளக்கம் என்ன?
விபத்துக்குள்ளான காரில் பயணம் செய்த இரண்டு ஆண்கள் சம்பவ இடத்திலேயே உயிரிழந்தனர். அதைத் தொடர்ந்து, இரண்டு சிறார்கள், ஒரு பெண் உள்பட மூன்று பேர் பலத்த காயங்களுடன் மீட்கப்பட்டனர். விபத்தில் உயிரிழந்தது, சிவகங்கை மாவட்டம் முத்துப்பட்டியைச் சேர்ந்த 25 வயதான சந்தோஷ் என்பது காவல் துறையின் விசாரணையில் தெரியவந்துள்ளது.
மேலும் மற்றவர்களின் விவரம் குறித்து நமணசமுத்திரம் காவல் துறையினர் தீவிர விசாரணை நடத்தி வருகின்றனர். இந்த கோர விபத்தால் புதுக்கோட்டை - மதுரை தேசிய நெடுஞ்சாலையில் சுமார் 2 மணி நேரம் போக்குவரத்து பாதிக்கப்பட்டது.
இதையும் படிங்க: குப்பையை தரம் பிரிக்கும் இயந்திரத்தில் சிக்கிய ஊழியர் - கோவையில் பரபரப்பு!
