மதுரை: நகர்ப்புற உள்ளாட்சித் தேர்தலில் பதிவான வாக்குகள் இன்று (பிப்.22) எண்ணப்பட்டு வருகின்றன. காலை 8 மணிக்கு வாக்கு எண்ணிக்கை தொடங்கிய நிலையில், மதுரை மாநகராட்சியின் பல்வேறு வார்டுகளில் திமுகவும் அதன் கூட்டணி கட்சிகளும் தொடர்ந்து முன்னிலையில் இருந்து வந்தன.
இந்நிலையில் பிற்பகல் 3.30 மணி நிலவரப்படி, தமிழ்நாடு தேர்தல் ஆணையத்தின் அதிகாரப்பூர்வ அறிவிப்பின்படி 68 வார்டுகளில் திமுக தனித்து 43 இடங்களிலும், அதன் கூட்டணிக் கட்சிகளான காங்கிரஸ் 5, கம்யூனிஸ்ட் 4, மதிமுக 2, விசிக 1 ஆகியவை 12 இடங்களிலும் வெற்றி பெற்று தொடர்ந்து திமுக கூட்டணி முன்னிலை வகித்து வருகிறது.
அதிமுக 11 இடங்களிலும், சுயேட்சைகள் 2 இடங்களிலும் வெற்றி பெற்றுள்ளனர். மொத்தமுள்ள 100 வார்டுகளில் 68 வார்டுகளின் முடிவுகள் அதிகாரப்பூர்வமாக அறிவிக்கப்பட்ட நிலையில் எஞ்சியுள்ள 32 இடங்களின் முடிவுகள் வரவுள்ளன. இந்நிலையில் மதுரை மாநகராட்சியை திமுக தனிப்பெரும்பான்மையுடன் கைப்பற்ற உள்ளது.
இதையும் படிங்க: கொடைக்கானல் நகராட்சி, பண்ணைக்காடு பேருராட்சியைக் கைப்பற்றிய திமுக
