ஈரோடு: ஈரோடு கனிராவுத்தர் குளம், சின்னதோட்டம் பகுதியைச் சேர்ந்தவர் விஜயதுரை, ஓய்வு பெற்ற கல்லூரி பேராசிரியர். இவரது மனைவி சாந்தி தனியார் கல்லூரியில் பேராசிரியராக பணியாற்றி வருகிறார். இவர்களுக்கு சுனந்தா என்ற மகளும், சரவணன் ஆதித்யா என்ற மகனும் உள்ளனர்.
சுனந்தாவும் இவரது தம்பி சரவணன் ஆதித்யாவும் மத்திய தொழில் பாதுகாப்பு படைப்பிரிவில் பணியாற்றி வருகின்றனர். இந்நிலையில் சுனந்தாவுக்கு நேற்று சென்னையில் திருமணம் நடைபெற்ற நிலையில் நேற்று முன்தினம் (ஏப்.26) இரவு இவர்களது வீட்டில் உள்ளே புகுந்த கொள்ளையன் வீட்டின் பூட்டை உடைத்து உள்ளே சென்று பீரோவில் இருந்த 12 பவுன் தங்க நகை மற்றும் ஒரு கிலோ வெள்ளி பொருள் இரண்டு சக்கரம் வாகனம் ஆகியவற்றைத் திருடிச் சென்றுள்ளான்.
இந்த கொள்ளை சம்பவம் தொடர்பாக அருகாமையில் வசிப்பவர்கள் அளித்த தகவலின் பெயரில் சென்னையிலிருந்த சுனந்தா காவல்துறையினருக்குத் தகவல் அளித்ததின் பேரில், சம்பவ இடத்திற்கு வந்த வீரப்பன் சித்திரம் காவல்துறையினர் இந்த கொள்ளை சம்பவம் தொடர்பாக விசாரணை மேற்கொண்டு வருகின்றனர்.
மத்திய தொழில் பாதுகாப்புப் படைப் பிரிவில் பணியாற்றி வரும் அதிகாரியின் திருமணத்திற்காக குடும்பத்துடன் சென்னை சென்றிருந்த நிலையில் அவரது வீட்டில் கொள்ளை அடிக்கப்பட்ட சம்பவம் அப்பகுதியில் பரபரப்பை ஏற்படுத்தியுள்ளது.
இதையும் படிங்க: வடமாநில கோயில்களுக்கு ஹெலிகாப்டர் சேவை எனக் கூறி மோசடி - பக்தர்களுக்கு எச்சரிக்கை!
