சென்னை: ஆவடி காவல் கட்டுப்பாட்டு அறையை நேற்று(டிச.21) தொடர்பு கொண்ட நபர் ஒருவர், ஐயப்பன் தாங்கல் முத்தமிழ் நகர் பகுதியில் வசித்து வரும் சபீர் என்பவர் வீட்டில் வெடிகுண்டு தயாரிப்பதாகக் கூறி அந்த நபர் தொடர்பைத் துண்டித்துள்ளார். பின்னர் உடனடியாக இது குறித்து மாங்காடு காவல்துறையினருக்கு அளித்த தகவலின் பேரில் மோப்ப நாய் மற்றும் வெடிகுண்டு நிபுணர்களுடன் காவல்துறையினர் அந்த அடையாளம் தெரியாத நபர் கூறிய வீட்டில் சோதனை மேற்கொண்டனர்.
இச்சோதனையில் வெடிகுண்டு தயாரிப்பதற்கான எந்த முகாந்திரமும் இல்லாததால் புரளி என்பது காவல்துறையினருக்குத் தெரியவந்தது. இதையடுத்து தொடர்பு கொண்ட அந்த அடையாளம் தெரியாத நபரின் செல்போன் எண்ணை வைத்து விசாரணை நடத்திய போது, ஜப்பானிலிருந்து அழைப்பு வந்திருப்பதும், ’yearly salary’ என்ற ஆன்லைன் லோன் நிறுவனத்தினர் பேசியிருப்பதும் விசாரணையில் தெரியவந்தது.
இதனையடுத்து சோதனை மேற்கொண்ட வீட்டில் வசித்து வரும் இம்ரான் என்பவரிடம் காவல்துறையினர் விசாரணை நடத்திய போது, சபீர் என்பவர் கடந்த 2 வருடங்களுக்கு முன்னதாக புழல் பகுதிக்கு வீட்டை காலி செய்து சென்றது தெரியவந்தது. பின்னர் புழலில் வசித்து வரும் சபீரை பிடித்து விசாரணை செய்த போது, கடந்த 3 ஆண்டுகளுக்கு முன்பு ஐயப்பன் தாங்கலில் வசித்து வந்த போது yearly salary என்ற ஆன்லைன் லோன் ஆப் மூலமாக 5லட்சம் ரூபாய்க் கடன் வாங்கியதாகவும், அதன் பிறகு விபத்து ஏற்பட்டதால் கடனை திருப்பி செலுத்தமுடியாமல் போனதாகத் தெரிவித்துள்ளார்.
இதனால் பல முறை கடன் செயலி நிறுவனம் தன்னை தொடர்பு கொண்டு கடனை கேட்டு தொல்லை கொடுத்து வந்ததால் வேறு வீட்டிற்குக் குடியேறி சென்றதாக விசாரணையில் தெரிவித்துள்ளார். அதன் பிறகு கடன் செயலி நிறுவனம் கடனை பெற பல வழிகளைக் கையாண்ட போதும், தன்னை பிடிக்க முடியாததால் வெடிகுண்டு மிரட்டல் புரளி தற்போது விடுத்துள்ளதாக விசாரணையில் தெரிவித்துள்ளார்.
இதையடுத்து அந்த செல்போன் செயலி நிறுவன அதிகாரிகளிடம் விசாரணை நடத்த முடிவு செய்துள்ளதாக காவல்துறையினர் தரப்பில் தெரிவிக்கப்பட்டுள்ளது. சமீபகாலமாக மோசடி ஆன்லைன் லோன் ஆப் நிறுவனம் அதிக வட்டி கேட்டு பொதுமக்களை மிரட்டியும், ஆபாசமாகப் புகைப்படங்களைச் சித்தரித்தும் பணப்பறிப்பில் ஈடுபட்டு வருகின்றனர்.
இந்தத் தொல்லை தாங்கமுடியாமல் பல இளைஞர்கள் தற்கொலை செய்து கொண்ட சம்பவமும் அரங்கேறியது. ஆனால் தற்போது வடிவேலு நகைச்சுவை காட்சி போல் ‘Bomb' உள்ளது என வதந்தியைப் பரப்பிய அந்நிறுவனத்தின் செயல் பரபரப்பை ஏற்படுத்தியுள்ளது.
இதையும் படிங்க: ஆன்லைன் ஆப் மூலம் கடன் பெறும் பெண்களே உஷார்!
