சென்னை: அண்ணா சாலையில் நேற்று (ஜன.28) 22 வயது பெண் மீது கட்டடம் இடிந்து விழுந்ததில் உயிரிழந்தார். இதற்கு கண்டனம் தெரிவித்து மார்க்சிஸ்ட் கம்யூனிஸ்ட் கட்சி மத்திய சென்னை மாவட்ட செயலாளர் செல்வா தலைமையில் அண்ணா சாலையில் கண்டன ஆர்ப்பாட்டம் நடைபெற்றது.
இந்த கண்டன ஆர்ப்பாட்டத்தில் 50-க்கும் மேற்பட்ட மார்க்சிஸ்ட் கட்சி தொண்டர்கள் கலந்து கொண்டனர். மாநகராட்சிக்கு எதிராகவும், அரசுக்கு எதிராகவும் முழக்கங்கள் எழுப்பினர். இந்த ஆர்ப்பாட்டத்தின் போது செய்தியாளர்களை சந்தித்த செல்வா கூறுகையில், "மெட்ரோ ரயில் நிலையத்திற்கு செல்லும் வழியில் இதுபோன்ற கட்டடம் இடிக்கப்பட்டுள்ளது.
ஜனவரி 13ஆம் தேதி இந்த கட்டடம் இடிப்பதற்கு மாநகராட்சி அனுமதி வழங்கியுள்ளது. ஆனால் மாநகராட்சி அதிகாரிகள் எந்த ஒரு ஆய்வும் செய்யாமல் அனுமதியை வழங்கி உள்ளனர். ஆய்வு இதனால் இளம்பெண்ணின் உயிர் பிரிந்துள்ளது. அனைவரும் சாலை வரி செலுத்துகிறோம். ஆகவே, சாலையில் செல்லும் பொழுது பாதுகாப்பு வழங்க வேண்டியது மாநகராட்சியின் கடமை.
அண்ணா சாலையில் இது போன்று நடைபெறுகிறது என்றால் கிராமங்களில் எவ்வளவு மரணங்கள் நடக்கும். அரசன் அலசியமே இதற்கெல்லாம் காரணம். கட்டடம் இடிந்து பெண் இறந்ததற்கு மாநகராட்சி பொறுப்பேற்க வேண்டும்.
அதற்கு காரணமாக இருந்த மாநகராட்சி அதிகாரங்கள் மீது விசாரணை மேற்கொள்ள வேண்டும். வட சென்னை பகுதிகளில் வருடம் தோறும் நூற்றுக்கணக்கான கட்டடங்கள் இடித்து புதுப்பிக்கப்படுகிறது. இனி வருங்காலங்களில் சரியாக ஆய்வு செய்து இடிப்பதற்கு அனுமதி வழங்க வேண்டும்.
உயிரிழந்த பெண்ணின் குடும்பத்தாருக்கு ரூ.1 கோடி நிவாரணம் வழங்க வேண்டும் என்று மார்க்சிஸ்ட் கம்யூனிஸ்ட் கட்சி சார்பாக வலியுறுத்துகிறோம். உயிரிழந்த பிறகு தடுப்பு அமைத்திருக்கிறார்கள். சிங்காரச் சென்னை என்று சொல்லுபவர் முதலில் பொதுமக்கள் செல்வதற்கு சரியான சாலை அமைக்க வேண்டும்" என தெரிவித்தார்.
இதையும் படிங்க: உள்ளாடையில் மறைத்து கடத்தப்பட இருந்த அமெரிக்க டாலர்கள் பறிமுதல்
