சென்னை: தெற்கு அந்தமான் பகுதியில் நிலவும் ஆழ்ந்த காற்றழுத்த தாழ்வு பகுதி காரணமாக தமிழ்நாட்டில் கனமழை பெய்து வருகிறது. குறிப்பாக சென்னை, காஞ்சிபுரம், செங்கல்பட்டு ஆகிய மாவட்டங்களில் இன்று (நவ. 29) காலை முதல் கனமழை பெய்து வருகிறது. இன்று மாலை வரை சென்னையில் 8 செ.மீ மழை பதிவாகியுள்ளதாக தெரிவிக்கப்பட்டு உள்ளது.
குறிப்பாக கொளத்தூரில் கடந்த 2 மணி நேரத்தில் மட்டும் 10 செ.மீ., மழை பதிவாகியுள்ளதாக கூறப்படுகிறது. இந்நிலையில், அடுத்த மூன்று மணி நேரத்தில் மிதமான இடி மின்னலுடன் கூடிய மிதமான மழை திருவள்ளூர், சென்னை, செங்கல்பட்டு, காஞ்சிபுரம், ராணிப்பேட்டை, வேலூர், திருவண்ணாமலை, கள்ளக்குறிச்சி, விழுப்புரம், கடலூர், அரியலூர், நாகப்பட்டினம், திருவாரூர், தஞ்சாவூர், புதுக்கோட்டை, ராமநாதபுரம், கோயம்புத்தூர், தேனி, தென்காசி, திருநெல்வேலி மற்றும் கன்னியாகுமரி உள்ளிட்ட 21 மாவட்டங்களிலும் புதுச்சேரி மற்றும் காரைக்கால் பகுதிகளிலும் பெய்ய வாய்ப்பு உள்ளது என தென் மண்டல வானிலை ஆய்வு மையம் தெரிவித்து உள்ளது.
கனமழை காரணமாக தண்ணீர் தேங்கியுள்ளதால் சென்னையில் உள்ள சைதாப்பேட்டை அரங்கநாதன் சுரங்கப்பாதை உள்ளிட்ட முக்கிய சுரங்கப்பாதைகள் மூடப்பட்டுள்ளதாக கூறப்படுகிறது. மேலும் இந்த ஆழ்ந்த காற்றழுத்த தாழ்வு பகுதி டிசம்பர் 2ஆம் தேதி புயலாக மாறும் என வானிலை மையம் கூறியுள்ளது.
தொடர் கனமழை காரணமாக சென்னை, செங்கல்பட்டு, திருவள்ளூர், காஞ்சிபுரம் ஆகிய மாவட்டங்களுக்கு ஆரஞ்சு அலர்ட் விடுக்கப்பட்டுள்ளது. இதனால் சென்னை, காஞ்சிபுரம், ராணிப்பேட்டை மாவட்டங்களில் பள்ளிகளுக்கு மட்டும் விடுமுறை என அறிவிக்கப்பட்டுள்ளது. மேலும் திருவள்ளூர் மாவட்டத்தில் பள்ளி, கல்லூரிகளுக்கு விடுமுறை அறிவிக்கப்பட்டுள்ளது. அதே வேளையில் செங்கல்பட்டு மாவட்டத்தில் பள்ளி, கல்லூரிகள் வழக்கம் போல் செயல்படும் என மாவட்ட நிர்வாகம் அறிவித்து உள்ளது.
இதையும் படிங்க: காலை உணவு திட்டம் தனியார் மூலம் வழங்க ஏற்பாடு - சென்னை மாநகராட்சி மாமன்ற கூட்டத்தில் தீர்மானம் நிறைவேற்றம்!
