சென்னை: கடந்த ஜூலை 11 ஆம் தேதி, சென்னை ராயப்பேட்டையில் உள்ள அதிமுக தலைமை அலுவலகம் சூறையாடப்பட்டதாக அளித்த புகாரின் அடிப்படையில் பதிவு செய்யப்பட்ட வழக்குகளை, சிபிஐ அல்லது வேறு விசாரணை அமைப்புகளுக்கு மாற்றக்கோரி முன்னாள் அதிமுக அமைச்சர் சி.வி.சண்முகம் சென்னை உயர் நீதிமன்றத்தில் மனு தாக்கல் செய்திருந்தார்.
இந்த மனு விசாரணைக்கு வந்தபோது, இச்சம்பவம் தொடர்பான மூன்று வழக்குகளையும் சிபிசிஐடிக்கு மாற்ற இருப்பதாக டிஜிபி தரப்பில் தெரிவிக்கப்பட்டது. இதனையடுத்து, வழக்கின் விசாரணை குறித்து அறிக்கை தாக்கல் செய்ய சிபிசிஐடிக்கு உத்தரவிட்ட உயர் நீதிமன்றம், வழக்கின் விசாரணையை செப்டம்பர் 19 ஆம் தேதிக்கு தள்ளி வைத்தது.
இந்நிலையில் வழக்கின் விசாரணையில் எந்த முன்னேற்றமும் இல்லை எனவும், விசாரணையை துரிதப்படுத்துமாறும் சிபிசிஐடிக்கு தகுந்த உத்தரவுகளை பிறப்பிக்க டிஜிபிக்கு உத்தரவிடக் கோரி சி.வி.சண்முகம் கூடுதல் மனுவை தாக்கல் செய்திருந்தார். இந்த மனு நீதிபதி இளந்திரையன் முன்பு இன்று (செப் 13) விசாரணைக்கு வந்தது.
அப்போது காவல்துறை தரப்பில் ஆஜரான வழக்கறிஞர், “கடந்த 7 ஆம் தேதி அதிமுக அலுவலகத்தில் ஆய்வு மேற்கொள்ளப்பட்டது. அப்போது கண்காணிப்பு கேமரா பதிவுகள் உள்ளிட்ட ஆதாரங்கள் சேகரிக்கப்பட்டுள்ளன. விசாரணை நிலை குறித்து செப்டம்பர் 19 ஆம் தேதி அறிக்கை தாக்கல் செய்யப்படும்” என வாதிட்டார்.
இதனைத்தொடர்ந்து வழக்கின் விசாரணையை விரைவாக முடிக்க அறிவுறுத்திய நீதிபதி இளந்திரையன், விசாரணை நிலை குறித்த அறிக்கையை தாக்கல் செய்ய உத்தரவிட்டு, சி.வி.சண்முகத்தின் மனுக்களை வருகிற 19 ஆம் தேதிக்கு தள்ளி வைத்தார்.
இதையும் படிங்க: மன்னிப்பு கேட்டாலும் ஓ.பி.எஸ்.ஐ ஏற்க முடியாது - எடப்பாடி ஆவேசம்
