நடிகர் ராஜிகாந்தின் மனைவி லதா ரஜினிகாந்த் ஸ்பீச் ஆஃப் சைல்டு (Speech of child) என்ற அமைப்பைத் தொடங்கி நடத்திவருகிறார். தற்போது இந்த அமைப்பு தமிழ்நாட்டில் உள்ள பல்வேறு தொண்டு நிறுவனங்களை தன்னுடன் ஒன்றிணைத்து செயல்பட உள்ளது.
அதற்கான செய்தியாளர் சந்திப்பு இன்று சென்னையில் உள்ள ரஷ்ய கலாசார மையத்தில் நடைபெற்றது. இந்த நிகழ்ச்சியில் ஸ்பீச் ஆஃப் சைல்டு நிறுவனத்தின் தலைவர் லதா ரஜினிகாந்த், பல்வேறு தொண்டு நிறுவனங்களின் அமைப்பாளர்கள் கலந்துகொண்டனர்.
அப்போது, லதா ரஜினி காந்த் பேசுகையில், 'எத்தனை மாதங்களாக நாங்கள் புதிய பட்டியல் போட்டாலும் ஒவ்வொரு மாதமும் பாதிக்கப்பட்ட குழந்தைகளின் எண்ணிக்கை அதிகமாகவே உள்ளது. பாதிக்கப்பட்ட குழந்தைகள் குறித்து எங்களால் பட்டியலிட முடியவில்லை. ஏனென்றால் மனம் முழுவதும் வலியாக உள்ளது.
சென்ற மாதம் நடந்தது இந்த மாதம் நடைபெறக் கூடாது என்று நினைக்கிறோம். ஆனால் குழந்தைகள் காணாமல் போவது, கடத்தல், ஆதரவின்றி தவிப்பது சமூகத்தில் சாதாரண ஒரு நிகழ்வு போன்று அன்றாடம் நடந்து கொண்டுதான் இருக்கிறது.
நம்மைச் சுற்றி உள்ள குழந்தைகளை பாதுகாப்பது என்பது பெற்றோரின் முதன்மையான கடமை. அவர்களுக்கு சரியான ஒரு உலகத்தை உருவாக்கிக் கொடுப்பது நமது கடமை.
நாமும் குழந்தைப் பருவத்தைக் கடந்துதான் வந்துள்ளோம். எது உங்கள் குழந்தைக்கு வேண்டும் என்று நினைக்கிறீர்களோ, அது அனைத்து குழந்தைகளுக்கும் கிடைக்க வேண்டும் என்ற எண்ணம் உங்களுக்குத் தோன்ற வேண்டும்.
குழந்தை என்பது தெய்வத்தின் சொரூபம்; நம்மை மனிதர்களாக மாற்றக்கூடிய சக்தி குழந்தைகளுக்கு உள்ளது. எதிர்பார்ப்பே இல்லாமல் பழகுவது குழந்தைகள். அவர்கள் பொக்கிஷம். சமூகம் ஒழுங்காக இருந்தால் குழந்தைகள் பாதுகாக்கப்படுவார்கள்' எனத் தெரிவித்தார்.
