கேப்டவுன்: மகளிர் டி20 உலகக்கோப்பை தொடரின் இறுதிப் போட்டி நியூலேண்ட்ஸ் கிரிக்கெட் மைதானத்தில் இன்று (பிப்.26) நடந்தது. ஆஸ்திரேலியா-தென் ஆப்பிரிக்கா அணிகள் மோதின. முதலில் டாஸ் வென்ற ஆஸ்திரேலிய மகளிர் அணியின் கேப்டந் மெக் லானிங் பேட்டிங்கை தேர்வு செய்தார். அதன்படி களமிறங்கிய அந்த அணியின் வீராங்கனைகள் 20 ஓவர்கள் முடிவில் 6 விக்கெட் இழப்புக்கு 156 ரன்களை எடுத்தனர்.
அதிகபட்சமாக பெத் மூனி 53 பந்துகளுக்கு 74 ரன்களை எடுத்தார். அதேபோல ஆஷ்லே கார்ட்னர் 21 பந்துகளுக்கு 29 ரன்களையும், அலிசா ஹீலி 20 பந்துகளுக்கு 18 ரன்களையும் எடுத்தனர். மறுபுறம் பந்துவீச்சில், தென் ஆப்பிரிக்க வீராங்கனைகள் ஷப்னிம் இஸ்மாயில் மற்றும் மரிசான் கேப் தலா 2 விக்கெட்டுகளை வீழ்த்தி அசத்தினர். அந்த வகையில், 157 ரன்கள் வெற்றி இலக்குடன் தென் ஆப்பிரிக்க அணி பேட்டிங் செய்தது.
தொடக்க ஆட்ட வீராங்கனையான லாரா வோல்வார்ட் 48 பந்துகளுக்கு 61 ரன்களை குவித்து ஆட்டமிழந்தார். இதையடுத்து களமிறங்கியவர்கள் அடுத்தடுத்து விக்கெட்டுகளை பறிகொடுத்தனர். 20 ஓவர்கள் முடிவில் 6 விக்கெட் இழப்புக்கு 137 ரன்களை மட்டுமே எடுத்து தோல்வியடைந்தனர். அதன்படி 19 ரன்கள் வித்தியாசத்தில் ஆஸ்திரேலியா அணி வெற்றி பெற்றது. தொடர்ந்து 6ஆவது முறையாக சாம்பியன் பட்டத்தை வென்று அசத்தியது. இந்த வெற்றியின் மூலம் அதிக முறை உலகக்கோப்பை டி20 போட்டிகளில் சாம்பியன் பட்டத்தை வென்ற கேப்டன் என்ற பெருமையை மெக் லானிங் பெற்றார்.
இதையும் படிங்க: டோனி, ஹர்மன்பிரீத் கவுர் ரன் அவுட்டால் இந்தியாவுக்கு நடந்த கொடுமை! ரசிகர்கள் விமர்சனம்
