மும்பை: கவர்ச்சியான கதாபாத்திரங்களில் கலக்கிவந்த நடிகை சன்னி லியோன் தற்போது சூப்பர் ஹீரோவாக அவதாரம் எடுத்துள்ளார்.
பாலிவுட் சினிமாக்கள், டிவி ஷோக்கள் என பிஸியாக உள்ள நடிகை சன்னி லியோன் தற்போது சூப்பர் ஹீரோவாக மாறியுள்ளார். தீய சக்திகளிடமிருந்து உலகைக் காக்கும் 'கோர்' என்ற சூப்பர் ஹீரோ கேரக்டராக அவதாரம் எடுத்துள்ள அவர், அந்தக் கதாபாத்திரத்துக்கான அறிமுக காணொலி ஒன்றை வெளியிட்டுள்ளார்.
அதில், கோர் இந்தக் கிரகத்தை சேர்ந்தவள் இல்லை. ஆனாலும் தீய சக்திகளிடமிருந்து உலகைக் காக்க தயாராக இருக்கிறாள் என்று குறிப்பிட்டுள்ளார். இது குறித்து சன்னி லியோன் கூறுகையில், 'சூப்பர் ஹீரோ கதையை நானும் எனது கணவர் டேனியல் வெப்பரும் இணைந்து உருவாக்கினோம். அந்த வகையில் கோர் கதாபாத்திரம் தீய சக்திகளை அழிக்கவருகிறது' என்றார்.
இதனிடையே, ஹாலிவுட் சூப்பர் ஹிட் படமான 'மேட்ரிக்ஸ்' பட கதாபாத்திரங்களின் லுக் போன்று சன்னி லியோனின் கோர் லுக் அமைத்திருப்பதாகப் பலரும் கருத்து தெரிவித்துவருகின்றனர்.
பாலிவுட் சினிமாவில் நடிக்கவந்த புதிதில் சூப்பர்ஹீரோவாக தனக்கு நடிக்க ஆசை என்று விருப்பம் தெரிவித்திருந்தார் சன்னி. இதையடுத்து தற்போது அதை நிறைவேற்றியுள்ளார். கோர் குறித்த மற்ற தகவல்கள் விரைவில் அறிவிக்கப்படும் எனத் தெரிகிறது.