சேவியர் பிரிட்டோ தயாரிப்பில் லோகேஷ் கனகராஜ் இயக்கத்தில் விஜய் நடிப்பில் வெளியான படம் 'மாஸ்டர்'. இதில் விஜய்சேதுபதி, மாளவிகா மோகனன், ஆண்ட்ரியா உள்ளிட்டோர் நடித்திருந்தனர். பொங்கல் வெளியீடாக திரையரங்குகளில் வெளியான இப்படம் வசூலில் சாதனைபுரிந்தது. அதுமட்டுமல்லாது நீண்ட மாதங்களாக திரையரங்குகளில் பெரிய படங்கள் வெளியாகாமல் இருந்த நிலையில், 'மாஸ்டர்' படம் வெளியாகி திரையரங்குகளை மீட்டது.
இதற்கிடையில், படம் திரையரங்கில் வெளியாகி குறைந்த நாள்களிலேயே ஓடிடி தளமான அமேசான் ப்ரைமில் வெளியானது. இதனால் திரையரங்கு உரிமையாளர்கள் அதிருப்தி அடைந்தனர். அதனைத்தொடர்ந்து நடைபெற்ற பேச்சுவார்த்தையில் சுமுக முடிவு எடுக்கப்பட்டு சில நிபந்தனைகளும் போடப்பட்டன. அதன்படி, பெரிய பட்ஜெட் படங்கள் திரையரங்குகளில் வெளியாகி 50 நாள்களுக்குப் பிறகும், சிறிய பட்ஜெட் படங்கள் திரையரங்குகளில் வெளியாகி 30 நாள்களுக்குப் பிறகும் ஓடிடியில் வெளியிட வேண்டும் என்று முடிவுசெய்யப்பட்டது.
இது குறித்து திரையரங்கு உரிமையாளர் சங்கத் தலைவர் திருப்பூர் சுப்பிரமணி வெளியிட்டுள்ள வாட்ஸ்அப் தகவலில் மாஸ்டர் திரைப்படம் வருகிற வியாழக்கிழமையுடன் (பிப்ரவரி 04) திரையரங்குகளில் வெளியிடுவது நிறுத்தப்படும்.
தொடர்ந்து படத்தை ஓட்ட விரும்பும் திரையரங்கு உரிமையாளர்கள் அந்தந்த மாவட்ட விநியோகஸ்தர்களிடம் தெரிவித்து அவர் தயாரிப்பாளரிடம் பேசிவிட்டு அனுமதி வழங்குவார். ஏற்கனவே தெரிவித்ததுபோல் சிறிய பட்ஜெட் படங்கள் திரையரங்குகளில் வெளியிட்டு 30 நாள்களுக்குப் பிறகே ஓடிடியில் வெளியிட வேண்டும்.
இ துகுறித்து தயாரிப்பாளர்களுக்குத் தெரிவிக்கப்பட்டது. இதுவே நடைமுறை என்று அதில் தெரிவித்திருந்தார்.
