சென்னை: சூப்பர் ஸ்டார் ரஜினிகாந்த் அண்ணாத்த படத்துக்கு பிறகு நெல்சன் திலீப் குமார் இயக்கத்தில் ஜெயிலர் என்ற படத்தில் நடித்து வருகிறார். இப்படத்தில் சிவ்ராஜ் குமார், மோகன் லால், தமன்னா, யோகி பாபு உள்ளிட்ட ஏகப்பட்ட நட்சத்திரங்கள் நடித்து வருகின்றனர். இப்படத்தின் படப்பிடிப்பு சென்னை, ஜெய்ப்பூர் உள்ளிட்ட பகுதிகளில் நடைபெற்று வருகிறது. படப்பிடிப்பை விரைவில் முடிக்க படக்குழு திட்டமிட்டுள்ளது.
இதனிடையே லைகா புரொடக்சன்ஸ் தயாரிக்கும் இரண்டு படங்களில் ரஜினிகாந்த் நடிக்க உள்ளார் என்று கூறப்பட்டது. அதன்படி இன்று லைகா புரொடக்சன்ஸ் நிறுவனர் சுபாஷ்கரன் பிறந்தநாளை ஒட்டி ரஜினி படத்தின் அறிவிப்பு வெளியிடப்பட்டது. ரஜினிகாந்த் நடிக்கும் 170ஆவது படத்தை லைகா நிறுவனம் தயாரிக்கிறது.
இப்படத்தை ஜெய் பீம் படத்தை இயக்கிய ஞானவேல் இயக்குகிறார். இதனை லைகா நிறுவனம் தனது ட்விட்டர் பக்கத்தில் பகிர்ந்துள்ளது. இப்படத்திற்கு வழக்கம்போல் அனிருத் இசை அமைக்கிறார். படம் அடுத்த ஆண்டு திரைக்கு வரும் என்று அறிவிக்கப்பட்டுள்ளது. ஏற்கனவே வந்த தகவலின் படி ரஜினிகாந்த் இப்படத்தில் முஸ்லீம் போலீஸ் வேடத்தில் நடிக்க உள்ளார் என்ற தகவல் வெளியாகியுள்ளது.
இது குறித்து லைகா புரொடக்சன்ஸ் வெளியிட்டுள்ள செய்திக் குறிப்பில், “லைகா குழுமத் தலைவர் சுபாஸ்கரன் பிறந்தநாளில் "சூப்பர் ஸ்டார்" ரஜினிகாந்த் "#தலைவர் 170" திரைப்படத்தின் அறிவிப்பை அனைவருடனும் பகிர்ந்து கொள்வதில் பெருமகிழ்ச்சி அடைகிறோம்.
லைகா புரொடக்ஷன்ஸ் நிறுவனத்தின் மற்றுமொரு பெருமைமிகு தருணம் இது. தலைமுறைகள் கடந்து திரை ரசிகர்களை மகிழ்வித்து மகிழ்கின்ற "சூப்பர் ஸ்டார்" ரஜினிகாந்தின் "#தலைவர் 170" திரைப்படத்தின் பணிகள் இனிதே ஆரம்பம்.
இயக்குநர் த.செ.ஞானவேல் இயக்கத்தில், இசைவழி நம் இதயங்களை இணைக்கும் அனிருத் இசையில், பிரம்மாண்டமான திரைப்படங்களைப் படைத்தளிக்கும் சுபாஸ்கரன் தயாரிப்பில், லைகா புரொடக்ஷன்ஸ் தலைமைப் பொறுப்பாளர் ஜி.கே.எம். தமிழ் குமரன் தலைமையில், "#தலைவர் 170" திரைப்படம் 2024ஆம் ஆண்டு திரைக்கு வரும் என்பதை மகிழ்ச்சியுடன் தெரிவித்துக் கொள்கிறோம்.
சூப்பர் ஸ்டார் அவர்களின் ஒவ்வொரு திரைப்பட வெளியீடும், ரசிகர்கள் கொண்டாடும் திருவிழாதான். அவருடன் மீண்டும் இணைவதில் லைகா புரொடக்ஷன்ஸ் பெருமிதம் கொள்கிறது. அனைவரின் வாழ்த்துகளோடு 2024-ல் மாபெரும் கொண்டாட்டத்திற்குத் தயாராவோம்” என்று தெரிவிக்கப்பட்டுள்ளது.
இதையும் படிங்க: #26YearsOfYuvanism: 'அளவற்ற அன்பிற்கு நன்றி' - யுவன் நெகிழ்ச்சி
