சென்னை: வினோத் இயக்கத்தில் நடிகர் சார்லி மற்றும் சென்ட்றாயன் ஆகியோர் நடித்துள்ள ஃபைண்டர் படத்தின் இசை வெளியீட்டு விழா சென்னை வடபழனியில் தனியார் திரையரங்கில் நடைபெற்றது. இந்த நிகழ்ச்சியில் கவிஞர் வைரமுத்து சிறப்பு விருந்தினராகக் கலந்து கொண்டார்.
இந்த நிகழ்ச்சியில் நடிகர் சார்லி பேசிய போது, ”41 ஆண்டுகளுக்கு முன்பு மிக அதிகமான வேலை காரணமாக நேரமில்லாத கவிஞராக இருந்தவர் வைரமுத்து. நான் என் நண்பர்கள் எழுதிய ஒரு கவிதைத் தொகுப்பை வெளியிட அவரை அழைத்தேன். அவ்வளவு கடினமான சூழ்நிலையிலும் அவர் எங்களுக்காகக் கலந்து கொள்ள ஒத்துக்கொண்டு வந்து கவிதைத் தொகுப்பை வெளியிட்டார். கிட்டத்தட்ட இந்த படத்திற்கு ஒரு நாளைக்கு 18 மணி நேரத்திற்கும் மேலாகத் தூங்காமல் கஷ்டப்பட்டு உழைத்திருக்கிறோம்” எனக் கூறினார்.
கவிஞர் வைரமுத்து பேசிய போது, “என் வீட்டிற்கு எந்த புதியவர்கள் வந்தாலும் நான் அவர்களைப் பேச விட்டு வேடிக்கை பார்ப்பேன். காரணம் எந்த புற்றில் எந்த பாம்பு இருக்கும் என்று அல்ல, எந்த விதையில் எந்த விருட்சம் இருக்கும் என்று. தமிழ் சினிமாவில் பார்க்க முடியாத இனம், தயாரிப்பாளர் இனம், சினிமாவில் வணங்கக் கூடிய ஒருவர் தயாரிப்பாளர்.
காதல் பாடல் எழுத வேண்டும் என்று என்னிடம் யாராவது சொன்னால், அது என்னென்ன சூழ்நிலை உண்டு என்று சொன்ன பிறகு தான் அவர்களுக்கு இப்படியெல்லாம் இருக்கிறது என்றே தெரியும் என்றார். மேலும் யார் வேண்டுமானாலும் பாடட்டும், எழுதட்டும், சினிமாவில் எது வேண்டுமானாலும் செய்யுங்கள். ஆனால் தமிழைத் தெரிந்துக் கொண்டு செய்யுங்கள் என்று கூறினார். இந்த படத்தின் தலைப்பைத் தமிழில் வைக்கக்கூடாதா என்று கேட்டேன். அதற்கு நியாயமான பதில் தெரிவித்தார்கள்.
எனக்கு ஒரு ஆசை நம் தமிழ்ச் சமூகம் பொய் பேசாத சமூகமாக இருக்க வேண்டும். நான் என் வாழ்வில் 99 சதவீதம் பொய்யே பேசுவதில்லை. மீதி 1 சதவீதம் அந்த உண்மையால் யாரும் பாதிக்கப்படக் கூடாது என்று மறைப்பதால் பொய் பேச வேண்டிய சூழ்நிலை ஏற்படுகிறது. இங்கு வியாபாரம் கூட தமிழுக்குத் தடையாக உள்ளது” என்று பேசினார்.
இதையும் படிங்க: "கோலிவுட் படங்களில் தமிழர்களுக்கு மட்டுமே இடம்?" - பெப்சி விளக்கம் என்ன?
