சென்னை: அருண் மாதேஸ்வரன் இயக்கத்தில் தனுஷ் நடித்துள்ள கேப்டன் மில்லர் திரைப்படம், பொங்கல் பண்டிகையை முன்னிட்டு வருகிற ஜனவரி 12ஆம் தேதி வெளியாக உள்ளது. படத்தில் தனுஷ் உடன் இணைந்து பிரியங்கா மோகன், சந்தீப் கிஷன், ஜான் கொக்கேன், நிவேதிதா சதீஷ் உள்ளிட்ட பலர் நடித்துள்ளனர்.
இப்படத்திற்கு ஜிவி பிரகாஷ் இசையமைக்க, சத்யஜோதி பிலிம்ஸ் நிறுவனம்தயாரித்துள்ளது. இப்படம் மூன்று பாகங்களாக வெளியாக உள்ளது என தகவல்கள் வெளியாகியுள்ளது. இந்நிலையில், கேப்டன் மில்லர் படத்தின் ப்ரீ ரிலீஸ் ஈவெண்ட், இன்று சென்னை நேரு உள்விளையாட்டு அரங்கில் கோலாகலமாக தொடங்கி நடைபெற்றது.
இந்நிகழ்ச்சியின் தொடக்கத்தில் சமீபத்தில் மறைந்த நடிகரும், தேமுதிக நிறுவனத் தலைவருமான கேப்டன் விஜயகாந்த் மற்றும் கன்னட நடிகர் புனித் ராஜ்குமார் ஆகிய இருவருக்கும் கேப்டன் மில்லர் படக்குழுவினர் மற்றும் அரங்கில் கூடி இருந்த ஆயிரக்கணக்கான ரசிகர்கள் இரண்டு நிமிடம் மௌன அஞ்சலி செலுத்தினர்.
தமிழ் திரையுலகின் நடிகரும், தேமுதிக தலைவருமான விஜயகாந்த், சினிமாவில் பெரும் முயற்சிக்குப் பிறகு நுழைந்து தனக்கென ஒரு இடத்தைப் பிடித்தவர். ரசிகர்களால் கொண்டாடப்பட்ட விஜயகாந்த், இன்றும் அவர் உதவும் குணத்தால் மக்களின் மனதில் நீங்கா இடம்பிடித்தவர்.
இவர் உடல்நலக்குறைவால் மருத்துவமனையில் சிகிச்சை பெற்று வந்த நிலையில், கடந்த டிசம்பர் 28ஆம் தேதி காலமானார். இவரது மறைவிற்கு திரையுலகினர், அரசியல் தலைவர்கள், லட்சக்கணக்கான ரசிகர்கள் அஞ்சலி செலுத்தினர்.
கன்னட நடிகர் புனித் ராஜ்குமார் ரசிகர்களால் ‘அப்பு’ என்றும் ‘பவர் ஸ்டார்’ என்றும் அழைக்கப்படுவார். இவர், கன்னட திரையுலகின் சூப்பர் ஸ்டாராக திகழ்ந்த மறைந்த ராஜ்குமாரின் இளைய மகனாவார். கன்னட திரையுலகின் சூப்பர் ஸ்டாராக திகழ்ந்த நடிகர் புனித் ராஜ்குமார் (46), மாரடைப்பால் கடந்த 2021ஆம் ஆண்டு காலமானார்.
இவர் நடிகராக மட்டுமல்லாமல், பொதுமக்களுக்கு பல்வேறு உதவிகளையும் செய்துள்ளார். அவர் வாழ்ந்த நாட்களில் இலவசப் பள்ளிகள், அனாதை இல்லங்கள், முதியோர் இல்லங்கள், சிறப்பு குழந்தைகளுக்கான பள்ளிகள், சுமார் 1,800 மாணவர்களுக்கு இலவசக் கல்வி என உதவி புரிந்துள்ளார்.
இதையும் படிங்க: நடிகர் சங்க கட்டடத்திற்கு நடிகர் விஜயகாந்த் பெயர் வைப்பதில் தவறில்லை - ஐஸ்வர்யா ராஜேஷ்
