நாங்குநேரி தொகுதி சட்டப்பேரவை உறுப்பினராக இருந்த வசந்தகுமார், கன்னியாகுமரி மக்களவை உறுப்பினராகத் தேர்ந்தெடுக்கப்பட்டதையடுத்து நாங்குநேரி தொகுதி எம்.எல்.ஏ. பதவியை அவர் ராஜினாமா செய்தார்.
இதையடுத்து நாங்குநேரி தொகுதி காலியானதாக அறிவிக்கப்பட்டு, அத்தொகுதிக்கு கடந்த 21ஆம் தேதி இடைத்தேர்தல் நடந்தது. காங்கிரஸ், திமுக கூட்டணி சார்பில் தொழிலதிபர் ரூபி மனோகரன் வேட்பாளராக நிறுத்தப்பட்டார்.
அதிமுக சார்பில் ரெட்டியார்பட்டி நாராயணன் களம்கண்டார். மறைந்த முதலமைச்சர் ஜெயலலிதா பாணியில், எடப்பாடி பழனிசாமி ரெட்டியார்பட்டி நாராயணனுக்கு ஒரு வாய்ப்பு வழங்கினார்.
இந்த நிலையில், கடந்த 21ஆம் தேதி, நாங்குநேரி தொகுதிக்கு இடைத்தேர்தல் நடந்தது. அதிமுக, காங்கிரஸ் வேட்பாளர்கள் என மொத்தம் 23 பேர் இந்தத் தேர்தலில் போட்டியிட்டனர்.
மொத்த வாக்காளர்கள் இரண்டு லட்சத்து 57 ஆயிரத்து 418 பேர். அவர்களில் ஒரு லட்சத்து 70 ஆயிரத்து 624 வாக்குகள் பதிவாகின. இது 66.35 விடுக்காடு ஆகும். இந்நிலையில் 299 வாக்குச்சாவடிகளில் பதிவான வாக்குப்பதிவு எந்திரங்கள் அனைத்தும் வாக்கு எண்ணிக்கை மையமான நெல்லை அரசு பொறியியல் கல்லூரியில் மூன்றடுக்கு பாதுகாப்புடன் வைக்கப்பட்டிருந்தது.
இந்நிலையில் இன்று காலை சற்று காலதாமதமாக 8.45-க்கு வாக்கு எண்ணும் பணி தொடங்கியது. 14 மேசைகள் போடப்பட்டு மொத்தம் 22 சுற்றுகளாக வாக்கு எண்ணும் பணி நடைபெற்றது. நேரடியாக தேர்தல் அலுவலர்கள் கண்காணிப்பில் வாக்குகள் எண்ணும் பணி நடைபெற்றது.
| அரசியல் கட்சி | பெற்ற வாக்குகள் |
| காங்கிரஸ் | 61 ஆயிரத்து 932 |
| அதிமுக | 95 ஆயிரத்து 377 |
| ஹரி நாடார் (சுயேச்சை) | நான்காயிரத்து 242 |
| நாம் தமிழர் | மூன்றாயிரத்து 494 |
| நோட்டா | ஆயிரத்து 154 |
முதல் சுற்றிலிருந்தே அதிமுக கூட்டணி முன்னணி வகித்த நிலையில் 22 சுற்றுகள் எண்ணப்பட்டு அதிமுக 95 ஆயிரத்து 377 வாக்குகள் பெற்று வெற்றிபெற்றது. 61 ஆயிரத்து 932 வாக்குகள் பெற்ற திமுக-காங்கிரஸ் கூட்டணி வேட்பாளர் இரண்டாம் இடத்துக்குத் தள்ளப்பட்டார்.
அதற்கு அடுத்த இடத்தில் சுயேச்சையாக போட்டியிட்ட ஹரி நாடார் நான்காயிரத்து 242 வாக்குகளும் நாம் தமிழர் கட்சி மூன்றாயிரத்து 494 வாக்குகளும் பெற்றிருந்தனர். நோட்டா தன்பங்கிற்கு ஆயிரத்து 152 வாக்குகளைத் தனதாக்கியது. ஆக, 33 ஆயிரத்து 445 வாக்குகள் அதிகம் பெற்று அதிமுக நாங்குநேரி தொகுதியில் வெற்றியை ருசித்தது.
இதையடுத்து ரெட்டியார்பட்டி நாராயணன் எம்ஜிஆரின் திருவுருவச் சிலைக்கு மாலை அணிவித்து மரியாதை செலுத்தினார். தொடர்ந்து அதிமுக தொண்டர்கள் இனிப்புகள் வழங்கிக் கொண்டாடினர்.
அதன்பிறகு தேர்தல் அலுவலர்களை சந்தித்த நாராயணசாமி சான்றிதழைப் பெற்றுக்கொண்டார். நாங்குநேரி தொகுதியில் போட்டியிட்ட 23 வேட்பாளர்களில் அதிமுக காங்கிரஸ் வேட்பாளர்களைத் தவிர அனைவரும் வைப்புத்தொகையை இழந்தனர் என்பது குறிப்பிடத்தக்கது.
இதையும் படிங்க: 'சீனி சக்கரை சித்தப்பா, பேப்பரில் எழுதி நக்கப்பா!' - காங்கிரசை பங்கம் செய்த ராஜேந்திர பாலாஜி
