பேரிடர்களை எதிர்கொள்ள பல்வேறு முயற்சிகளையும், முன்னெச்சரிக்கை நடவடிக்கைகளையும் தமிழ்நாடு அரசு தொடர்ந்து மேற்கொண்டு வருகிறது. இந்த நிலையில், அதன் ஒரு கட்டமாக இன்று, பிரிட்டன் அலுவலர்களுடன் இணைந்து பயிற்சி முகாம் நடத்தியுள்ளதாக, தமிழ்நாட்டின் வருவாய் மற்றும் பேரிடர் மேலாண்மைத் துறை அமைச்சர் உதயகுமார் தெரிவித்துள்ளார்.
மேலும் வடகிழக்குப் பருவ மழையைப் பாதுகாப்பாக எதிர்கொள்ளவும், மழைநீரை சேகரிக்கவும் பாதுகாப்பு நடவடிக்கைகள் மேற்கொள்ளப்பட்டுள்ளதாகவும் தெரிவித்த அவர், இது தொடர்பாக, முதலமைச்சர் எடப்பாடி பழனிசாமி தலைமையில் நடைபெற்ற ஆலோசனைக் கூட்டத்தில், வெள்ளத்தின்போது தாழ்வான பகுதிகளில் உள்ள மக்களை வெளியேற்றுவது, உணவு மற்றும் மருத்துவப் பொருட்களை கையிருப்பில் வைத்துக்கொள்வது, தண்ணீரை வெளியேற்றுவது, மக்களை மீட்பது, நோய்களைக் கட்டுப்படுத்துவது போன்ற பல்வேறு நடவடிக்கைகள் குறித்தும் விவாதிக்கப்பட்டதாக கூறினார்.
மேலும், கடலோர மாவட்டங்களில் இந்த வெள்ள முன்னெச்சரிக்கை நடவடிக்கைகள் தொடர்பாக, தொடர்ந்து ஆய்வு மேற்கொண்டு வருவதாக கூறிய அமைச்சர், இந்த முன்னெச்சரிக்கை நடவடிக்கைகளை மேற்கொள்வதில் மக்களுக்கு இன்னும் அதிக விழிப்புணர்வுத் தேவை என்றும், மக்களும் அரசுடன் இணைந்து ஒத்துழைத்தால் மட்டுமே அரசின் நடவடிக்கைகள் வெற்றி அடையும் என்றும் தெரிவித்தார்.
தொடர்ந்து பேசிய அவர், ஏரி, குளங்கள் தூர்வாரப்பட்டுத் தயார் நிலையில் இருக்கிறது. தண்ணீரை சேமித்து வைப்பதற்கான அத்தனை நடவடிக்கைகளையும் தமிழ்நாடு அரசு மேற்கொண்டுள்ளது. கடந்த பருவமழைக் காலங்களில் சென்னையில் 2,000க்கும் அதிகமான இடங்களில் தண்ணீர் தேங்கிய நிலையில், இந்த வருடம் வெள்ளத் தணிப்பு நடவடிக்கைகளுக்காக கூடுதலான நிதி ஒதுக்கப்பட்டு, தற்போது 200 இடங்களாகக் குறைக்கப்பட்டுள்ளது. அதேபோல் நவீன இயந்திரங்கள் கொண்டு குப்பைகளை அகற்றுவது, தண்ணீரை வெளியேற்றுவது போன்ற நடவடிக்கைகளை மேற்கொள்ள தமிழ்நாடு அரசு தயார் நிலையில் இருக்கிறது என்றார்.
இதையும் படிங்க:
திற்பரப்பு அருவியில் வெள்ளம்... சோகத்தோடு திரும்பும் சுற்றுலாப் பயணிகள்!
