உத்தரகாசி: உத்தரகாண்ட் மாநிலத்தில் உள்ள உத்தரகாசி மாவட்டத்தில் உள்ள பிரம்மகால் - யமுனோத்ரி நெடுஞ்சாலையில் மலையைக் குடைந்து சுரங்கம் அமைக்கும் பணியானது நடைபெற்று வந்தபோது, கடந்த நவம்பர் 12ஆம் தேதி சுரங்கத்தில் திடீரென நிலச்சரிவு ஏற்பட்டு விபத்துக்குள்ளானது.
அந்த விபத்தில், பணியில் ஈடுபட்டிருந்த சுமார் 41 தொழிலாளர்களும் சுரங்கத்திற்குள் சிக்கிக் கொண்டனர். இந்த 41 தொழிலாளர்களை மீட்கும் முயற்சியில், பல மீட்புக்குழுக்கள் மற்றும் ஏஜென்சிகள் மற்றும் தேசிய மீட்புப் படையினர் உள்ளிட்டோர் இரவு, பகலாக முயற்சி செய்தனர். இறுதியாக, தீவிரமான முயற்சியால் கடந்த நவ.28 ஆம் தேதி சில்க்யாரா சுரங்கத்தில் சிக்கி இருந்த 41 தொழிலாளர்களை தேசிய மீட்புப் படையினர் பத்திரமாக மீட்டனர்.
இந்த நிலையில், கட்டுமானத் தொழிலாளர்களின் பணிகள் தற்போது வரை தொடங்கப்படவில்லை எனவும் வட்டாரங்கள் தரப்பில் கூறப்படுகிறது. இது குறித்து சுரங்கத்தின் கட்டுமான நிறுவன அதிகாரிகள் அதிகாரப்பூர்வமான தகவல்கள் எதுவும் கூறவில்லை.
இந்த சுரங்கப்பாதை விபத்து குறித்து மத்திய அரசு அமைத்த நிபுணர் குழு, இந்த பகுதியில் கடந்த 4 நாட்களாக ஆய்வு செய்து டெல்லி சென்றதாக வட்டாரங்கள் தகவல் தெரிவிக்கின்றன. இந்த குழு ஆய்வு செய்த முதற்கட்ட விசாரணை அறிக்கையை அமைச்சகத்திடம் சமர்ப்பிப்பதாகவும், அறிக்கையின் அடிப்படையில் வரும் நாட்களில் சுரங்கப் பணிகள் நடைபெறும் எனவும் எதிர்பார்க்கப்படுகிறது.
மேலும், சார்தாம் அனைத்து வானிலை சாலை திட்டத்தின் கீழ் சில்க்யாரா சுரங்கப்பாதை (Silkyara Tunnel of Chardham All Weather Road Project) அமைக்கப்பட உள்ளது. இந்த திட்டமானது 4.531 கி.மீட்டர் நீளம் கொண்டதாகும். இதில் இன்னும் 480.மீ மட்டுமே தோண்டப்பட உள்ளது என்பது குறிப்பிடத்தக்கது.
இதையும் படிங்க: சாதனை படைத்த சந்திரயான்..! ஆச்சரியத்தில் ஆழ்த்திய ஆதித்யா..! இஸ்ரோவிற்கு இனிக்கும் ஆண்டான 2023..!
