பிரதமர் நரேந்திர மோடி இம்மாத இறுதியில் அமெரிக்கா செல்லவுள்ளதாகத் தகவல் வெளியாகியுள்ளது. இந்தப் பயணம் தொடர்பான அதிகாரப்பூர்வ தகவல் இதுவரை வெளியாகவில்லை. ஆனால், ஏ.என்.ஐ. செய்தி நிறுவனத்தின் தகவலின்படி, பிரதமரின் அமெரிக்கப் பயண ஏற்பாடுகள் நடந்து வருவதாகவும், அட்டவணை இன்னும் இறுதிசெய்யப்படவில்லை என்றும் தெரிவிக்கப்பட்டுள்ளது.
தற்காலிகத் திட்டத்தின்படி, நரேந்திர மோடி வரும் 23, 24 ஆகிய தேதிகளில் அமெரிக்காவில் சுற்றுப்பயணம் மேற்கொள்ளவுள்ளார். அமெரிக்காவின் அதிபராக ஜோ பைடன் பொறுப்பேற்ற பிறகு, அந்நாட்டுக்கு மோடி நேரடியாகச் சென்று முதன்முறையாக பைடனை நேரில் சந்திக்கிறார்.
இதற்கு முன்னதாக, இருவரும் குவாட் உச்சி மாநாடு, ஜி7 மாநாடு உள்ளிட்ட பல நிகழ்வுகளில் காணொலி வாயிலாக சந்தித்துப் பேசியுள்ளனர்.
மோடி கடைசியாக 2019ஆம் ஆண்டு அமெரிக்கா சென்றிருந்தார். அப்போது, அவரும் அமெரிக்காவின் முன்னாள் அதிபர் டொனால்ட் ட்ரம்பும் ஹூஸ்டனில் நடந்த 'ஹவுடி மோடி' நிகழ்ச்சியில் உரையாற்றினார்கள்.
செப்டம்பரில் அமெரிக்கா செல்லும் மோடி, வாஷிங்டன் டிசி, நியூயார்க் ஆகிய நகரங்களுக்குச் செல்வார் என்று எதிர்பார்க்கப்படுகிறது. ஆப்கானிஸ்தானில் தாலிபான்கள் ஆட்சியைக் கைப்பற்றியுள்ள நிலையில், மோடியின் இப்பயணம் முக்கியத்துவம் வாய்ந்ததாகப் பார்க்கப்படுகிறது.
நியூயார்க்கில் ஐக்கிய நாடுகள் சபையின் ஆண்டுப் பொதுக்குழு கூட்டம் நடைபெற உள்ல நிலையில், அதில் மோடி பங்கேற்கவும் வாய்ப்புள்ளதாகத் தெரிவிக்கப்பட்டுள்ளது.
இதையும் படிங்க: தாலிபான்களுடன் பாக். வீரர்கள் இருந்தார்களா - பென்டகன் கூறுவது என்ன?
