மும்பை: மகாராஷ்டிரா மாநிலம் புனேயில் ஜி20 கூட்டமைப்பின் முதலாவது உள்கட்டமைப்பு பணிக்குழுக் கூட்டம் இன்று (ஜனவரி 16) தொடங்குகிறது. இந்த கூட்டத்தில் அழைப்பு விடுக்கப்பட்ட உறுப்பு நாடுகளின் முக்கிய தலைவர் சிறப்பு விருந்தினராகப் பங்கேற்பார்கள். இந்தியாவுடன் ஆஸ்திரேலியா மற்றும் பிரேசில் நாடுகள் இணைந்து இந்தக் கூட்டத்தை நடத்தவுள்ளன.
இந்தக் கூட்டத்தில் உள்கட்டமைப்பு முதலீடுகளின் பல்வேறு அம்சங்களை ஆலோசிக்கப்படும். அந்த வகையில் தரமான உள்கட்டமைப்பு முதலீட்டை ஊக்குவித்தல் மற்றும் உள்கட்டமைப்பு முதலீட்டிற்கான நிதி ஆதாரங்களை திரட்டுவதற்கான புதுமையான அம்சங்களை அடையாளம் காணுதல் போன்றவை குறித்து தலைவர்கள் ஆலோசனை நடத்துவர்.
இந்தக் கூட்டத்தில் முதன்மையான முன்னுரிமை அம்சமாக "நாளைய நகரங்களை உருவாக்க நிதி அளித்தல்: உள்ளடக்கிய, நெகிழ்ச்சித் தன்மையுடன் கூடிய மற்றும் நிலையான தன்மை கொண்ட நகரங்கள்" என்ற தலைப்பில் விவாதம் நடைபெறும். நகரங்களை வளர்ச்சியின் மையங்களாக மாற்றுதல், நகர்ப்புற உள்கட்டமைப்பிற்கு நிதியளித்தல், எதிர்காலத்திற்கு ஏற்ற நகர்ப்புற உள்கட்டமைப்பை உருவாக்குதல், ஆற்றல் திறனுள்ள மற்றும் சுற்றுச்சூழல் பாதுகாப்புடன் கூடிய உள்கட்டமைப்பு ஆகியவற்றுக்கு தனியார் நிதிகளை ஈர்ப்பது மற்றும் சமூக ஏற்றத்தாழ்வுகளைக் களைதல் போன்ற பல்வேறு அம்சங்களில் இந்த கருப்பொருள் கவனம் செலுத்தும்.
புனே கூட்டத்தின் ஒரு பகுதியாக "நாளைய நகரங்களுக்கு நிதியளித்தல்" என்ற உயர்மட்டப் பயிலரங்கமும் நடைபெறும். நாளைய நகரங்களை உருவாக்குவதற்கான தொழில்நுட்ப மற்றும் நிர்வாகத் திறன் தேவைகள், தனியார் நிதியை அதிகரிப்பதில் முதலீட்டாளர்களின் பரிசீலனைகள் மற்றும் நாளைய நகரங்களின் நிதித் திறன் தேவைகள் ஆகியவற்றுடன் தொடர்புடைய அம்சங்கள் இந்த பயிலரங்கத்தில் விவாதிக்கப்படும்.
ஜி-20 கூட்டத்திற்கு முன்னதாக புனே மாநகராட்சி மற்றும் பிற புனே நகர ஆர்வலர்களால் மக்கள் பங்களிப்புடன் கூடிய நிகழ்ச்சிகள் நடத்தப்பட்ட ன. இதில் ஜி-20 பற்றிய விளக்கங்கள், 'நகரங்களை எதிர்காலத்துக்கு ஏற்ப தயார்படுத்துதல் மற்றும் நகர்ப்புற வளர்ச்சியின் முக்கியத்துவம்' என்ற கருத்தரங்கம், ஜி-20 சைக்ளத்தான் (சைக்கிள் போட்டி) ஆகியவை அடங்கும். தேசிய இளைஞர் தினத்தில் மோட்டார் சைக்கிள் பேரணி, தூய்மை இயக்கம் மற்றும் கல்வி நிறுவனங்களில் மாதிரி ஜி-20 விவாதங்கள் போன்றவையும் நடத்தப்பட்டன. ஜி 20 தொடர்பாக நடைபெறும் விவாதங்களில் அனைத்து தரப்பு மக்களையும் ஈடுபடுத்துவதை இந்த முயற்சி நோக்கமாகக் கொண்டுள்ளது.
இந்தியாவின் ஜி-20 தலைமைத்துவத்தின்போது, நகரங்கள் எதிர்கொள்ளும் சவால்களை எதிர்கொள்ளுதல், எதிர்காலத்தில் நகரங்களில் உள்ள வாய்ப்புகள் மற்றும் நகரங்களை மேலும் சிறந்த தன்மையுடையவையாக மாற்றுதல் ஆகியவை தொடர்பாக ஒரு செயல்திட்டத்தை உருவாக்குவதற்கு ஜி-20 உள்கட்டமைப்புப் பணிக்குழு ஒரு தளமாக பயன்படுத்தப்படும். மத்திய நிதி அமைச்சகம் ஜி-20 உள்கட்டமைப்பு செயல்திட்டங்களை வழிநடத்தி, புதிய யோசனைகளை உருவாக்கி, கூட்டு நடவடிக்கைகளைத் துரிதப்படுத்துவதை உறுதி செய்யும் வகையில் செயல்படும்.
இதையும் படிங்க: தமிழில் பொங்கல் வாழ்த்து தெரிவித்த பிரதமர் மோடி
