சென்னை: இயக்குநர் ராஜ்குமார் பெரியசாமி இயக்கத்தில், நடிகர் சிவகார்த்திகேயன் நடிப்பில் உருவாகி இருக்கும் திரைப்படம் அமரன். இப்படத்தை நடிகர் கமல்ஹாசனின் ராஜ் கமல் ஃப்லிம்ஸ் இண்டர்நேஷ்னல் நிறுவனமும், சோனி பிக்சர்ஸ் இண்டர்நேஷ்னல் நிறுவனமும் இணைந்து தயாரிக்கிறது. இதற்கு இசையமைப்பாளர் ஜி.வி.பிரகாஷ் இசையமைத்துள்ளார்.
தமிழகத்தைச் சேர்ந்த மறைந்த மேஜர் முகுந்த் வரதராஜனின் வாழ்க்கையை மையப்படுத்தி இப்படம் உருவாகியுள்ளது. இதில், சிவகார்த்திகேயனுக்கு ஜோடியாக நடிகை சாய் பல்லவி நடித்துள்ளார். இந்த நிலையில், சென்னை, காஷ்மீர், மூணாறு உள்ளிட்ட பகுதிகளில் நடைபெற்று வந்த இப்படத்தின் படப்பிடிப்பு நிறைவு பெற்றுள்ளதாக படக்குழு அதிகாரப்பூர்வமாக அறிவித்துள்ளது.
முன்னதாக, கடந்த பிப்ரவரி 16ஆம் தேதி அமரன் படத்தின் டீசர் வெளியிடப்பட்டது. தொடர்ந்து, சிவகார்த்திகேயன் பிறந்தநாளை முன்னிட்டு, படத்தின் செகண்ட் லுக் போஸ்டரை படக்குழு வெளியிட்டது.
