தூத்துக்குடி: தூத்துக்குடி அண்ணா நகர் 4வது தெருவைச் சேர்ந்தவர் செந்தில் ஆறுமுகம் (32). வழக்கறிஞர் மற்றும் தொழிலதிபரான இவர் அந்தப் பகுதியில் மெடிக்கல் மற்றும் உடற்பயிற்சி கூடம் நடத்தி வருகிறார். இவருக்கும் இவரது தங்கை கணவரான கோவில்பட்டியில் வசித்து வரும் கோபிநாதன் என்பவருக்கும் சொத்து தகராறு இருந்ததாக கூறப்படுகிறது.
இந்நிலையில் செந்தில்குமார் நேற்று இரவு மெடிக்கல் மற்றும் உடற்பயிற்சி கூடத்தை அடைத்து விட்டு இரண்டு தெருக்கள் தள்ளி உள்ள தனது வீட்டிற்கு நடந்து சென்றுள்ளார். அப்போது அங்கு இருசக்கர வாகனத்தில் மறைந்திருந்த 6 பேரை கொண்ட கும்பல் அவரை சரமாரியாக ஓட விரட்டி கொடூரமாக வெட்டி கொலை செய்துவிட்டு தப்பி ஓடியுள்ளனர்.
இந்த சம்பவம் தூத்துக்குடியில் பெரும் பரபரப்பை ஏற்படுத்தியுள்ளது. இதைத் தொடர்ந்து மாவட்ட காவல் கண்காணிப்பாளர் பாலாஜி சரவணன் சம்பவ இடத்தை பார்வையிட்டு விசாரணை நடத்தினார். அப்போது நகர காவல் உதவி கண்காணிப்பாளர் கேல்கர் சுப்பிரமணிய பாலச்சந்திரா, தென்பாகம் போலீஸ் இன்ஸ்பெக்டர் ராஜாராம் உள்ளிட்ட போலீசார் உடன் இருந்தனர்.
இந்த கொலை சம்பவம், சொத்து தகராறுக்காக நடைபெற்றதா? அல்லது வேறு ஏதேனும் தொழில் பிரச்சனை காரணமாக நடைபெற்றதா? என்று கோணத்தில் தென்பாகம் காவல்துறையினர் வழக்கு பதிவு செய்து விசாரணை நடத்தி வருகின்றனர். இந்நிலையில் சம்பவத்தில் ஈடுபட்ட குற்றவாளிகளை உடனடியாக கைது செய்ய எஸ்.பி. உத்திரவிட்டதை தொடர்ந்து 4 தனிப்படை அமைக்கப்பட்டு உடனடியாக தேடுதல் வேட்டையில் போலீசார் ஈடுபட்டுள்ளனர்.
இந்நிலையில் கொலை செய்து விட்டு தப்பிச் சென்றவர்களை தனிப்படை போலீசார் கைது செய்து விசாரணை நடத்தி வருகின்றனர்.
