ਖਡੂਰ ਸਾਹਿਬ : ਲੋਕ ਸਭਾ ਹਲਕਾ ਖਡੂਰ ਸਾਹਿਬ ਤੋਂ ਕਾਂਗਰਸੀ ਉਮੀਦਵਾਰ ਜਸਬੀਰ ਸਿੰਘ ਡਿੰਪਾ ਨੇ ਆਪਣੀ ਵਿਰੋਧੀ ਉਮੀਦਵਾਰ ਬੀਬੀ ਜਗੀਰ ਕੌਰ ਦੇ ਬੀਤੇ ਦਿਨੀਂ ਵਿਧਾਨ ਸਭਾ ਹਲਕਾ ਖਡੂਰ ਸਾਹਿਬ ਵਿਖੇ ਹੋਏ ਵਿਰੋਧ ਨੂੰ ਸ਼੍ਰੋਮਣੀ ਅਕਾਲੀ ਦਲ ਦੀਆਂ ਪੰਥ ਵਿਰੋਧੀ ਨੀਤੀਆਂ ਕਿਹਾ ਹੈ।
ਡਿੰਪਾ ਨੇ ਕੱਲ੍ਹ ਕਪੂਰਥਲਾ ਵਿਖੇ ਹੀ ਬਿਕਰਮ ਮਜੀਠੀਆ ਦੇ ਉਸ ਬਿਆਨ ਨੂੰ ਵੀ ਠੁਕਰਾ ਦਿੱਤਾ ਜਿਸ ਵਿੱਚ ਇੰਦਰਾ ਗਾਂਧੀ ਅਤੇ ਪ੍ਰਿਅੰਕਾ ਗਾਂਧੀ ਦੇ ਪੋਸਟਰ ਵਾਲੇ ਮਾਮਲੇ ਵਿੱਚ ਸਿਖਾਂ ਨੂੰ ਠੇਸ ਪਹੁੰਚਾਉਣ ਦੇ ਮਾਮਲੇ ਵਿੱਚ ਮੁਆਫ਼ੀ ਮੰਗਣ ਨੂੰ ਕਿਹਾ ਗਿਆ ਸੀ। ਡਿੰਪਾ ਨੇ ਕਿਹਾ ਕਿ ਪਹਿਲਾ ਮਜੀਠੀਆ ਆਪਣੇ ਬਜ਼ਰੁਗਾਂ ਦੇ ਇਤਿਹਾਸ ਨੂੰ ਦੇਖਣ ਅਤੇ ਨਾਲੇ ਸ਼੍ਰੋਮਣੀ ਅਕਾਲੀ ਦਲ ਨੂੰ ਅਜਿਹੀਆਂ ਗੱਲਾਂ ਸੋਭਾ ਨਹੀਂ ਦਿੰਦੀਆਂ।
ਡਿੰਪਾ ਜੋ ਕਿ ਟਿਕਟ ਮਿਲਣ ਤੋਂ ਬਾਅਦ ਕਪੂਰਥਲਾ ਵਿੱਚ ਚੋਣ ਪ੍ਰਚਾਰ ਲਈ ਆਏ ਸਨ ਨੇ ਕਿਹਾ ਕਿ ਰਾਣਾ ਗੁਰਜੀਤ ਸਿੰਘ ਦੀ ਅਗਵਾਈ ਵਿੱਚ ਇੱਕ ਵਿਸ਼ਾਲ ਇਕੱਤਰਤਾ ਨੇ ਲੋਕਾਂ ਦੀ ਉਸ ਸ਼ੰਕਾ ਨੂੰ ਵੀ ਦੂਰ ਕਰ ਦਿੱਤਾ ਹੈ ਜੋ ਸੋਚਦੇ ਸਨ ਕਿ ਰਾਣਾ ਗੁਰਜੀਤ ਸਿੰਘ ਅਤੇ ਉਹਨਾਂ ਵਿੱਚ ਮਤਭੇਦ ਹੈ ਪਰ ਨਾਲ ਹੀ ਉਹਨਾਂ ਮੰਨਿਆਂ ਕਿ ਜਦੋਂ ਰਾਣਾ ਗੁਰਜੀਤ ਸਿੰਘ ਚੋਣ ਲੜੇ ਸਨ ਤਾਂ ਹਾਲਾਤ ਕੁਝ ਹੋਰ ਸਨ ਜਿਸ ਦੇ ਚੱਲਦਿਆਂ ਮਾਝੇ ਤੋਂ ਉਨ੍ਹਾਂ ਨੂੰ ਨੁਕਸਾਨ ਹੋਇਆਂ ਸੀ, ਪਰ ਹੁਣ ਹਾਲਾਤ ਹੋਰ ਹਨ ਤੇ ਉਹਨਾਂ ਨਾਲ ਰਾਣਾ ਦੇ ਕੋਈ ਮਤਭੇਦ ਨਹੀਂ ਹਨ।
