ରାଉରକେଲା: ଆଦିବାସୀ ବହୁଳ ଜିଲ୍ଲା ସୁନ୍ଦରଗଡ଼ ଜିଲ୍ଲା । ଏହି ଆଦିବାସୀ ବହୁଳ ଜିଲ୍ଲାରେ ଲୋକେ ଚାଷକୁ ଦେଉଛନ୍ତି ଗୁରୁତ୍ୱ । ବର୍ତ୍ତମାନ ବାର ମାସିଆ ଚାଷ କରି ଭଲ ଦି ପଇସା ରୋଜଗାର କରୁଛନ୍ତି । କେବଳ ଆମ୍ବ ଚାଷ କରି କରୁଛନ୍ତି ଲକ୍ଷାଧିକ ଟଙ୍କା ଉପାର୍ଜନ । ଏକ ଛୋଟ ଗାଁର କୃଷକ କିନୁ ସିଂ ବର୍ତ୍ତମାନ ଜଣେ ସଫଳ ଆମ୍ବ ଚାଷୀ ହୋଇପାରିଛନ୍ତି । ସୁନ୍ଦରଗଡ଼ ଜିଲ୍ଲା ନୂଆଗାଁ ବ୍ଲକ ଘୋଡାବନ୍ଧ ଗ୍ରାମର ବାସିନ୍ଦା ହେଉଛନ୍ତି କିନୁ ସିଂ । ତାଙ୍କର କଠିନ ପରିଶ୍ରମ, ନିଷ୍ଠା ଏବଂ କୃଷି ପ୍ରତି ଉତ୍ସାହ ଯୋଗୁଁ ଆଜି ପାଲଟିଛନ୍ତି ଜଣେ ସଫଳ ଚାଷୀ । କିନୁ ସିଂ ଏକ କ୍ଷୁଦ୍ର ଜମି ସହିତ କୃଷକ ଭାବରେ ଯାତ୍ରା ଆରମ୍ଭ କରିଥିଲେ । ସେ ପ୍ରଥମେ ଧାନ ଏବଂ ପନିପରିବା ଚାଷ କରିଥିଲେ ।
କିନୁ ସିଂ ଆମ୍ବ ଚାଷ ଯାତ୍ରା: ରାଉରକେଲା କୃଷି ବିଜ୍ଞାନ କେନ୍ଦ୍ର ସହ ଯୋଗାଯୋଗ କରିଥିଲେ । ଏହାପରେ ତିନି ହେକ୍ଟର ଜମିରେ ସେ ଆରମ୍ଭ କରିଥିଲେ ଆମ୍ବ ଚାଷ । ବହୁ ପରିଶ୍ରମ ପରେ କିନୁ ସିଂ ଶେଷରେ ଆମ୍ବ ଚାଷ ପାଇଁ ଉପଯୁକ୍ତ ପଦ୍ଧତି ପାଇଲେ । ସେ ଜୈବିକ ସାର ଏବଂ କୀଟନାଶକ ନିୟନ୍ତ୍ରଣ ପ୍ରଣାଳୀ ବ୍ୟବହାର କରିବା ଆରମ୍ଭ କରିଥିଲେ । ଯାହା ତାଙ୍କୁ ଆମ୍ବ ବଢାଇବାରେ ସାହାଯ୍ୟ କଲା ଯାହା କେବଳ ସୁସ୍ଥ ନୁହେଁ ବରଂ ସ୍ୱାଦିଷ୍ଟ ମଧ୍ୟ ଥିଲା । ଆମ୍ବ ମଧ୍ୟରେ ବିଭିନ୍ନ ଭେରାଇଟି ରୂପରେ ଦଶେରୀ, ବାଇଗଣ ପଲ୍ଲୀ, ଅମ୍ରପାଲି, ମଲ୍ଲିକା ଆଦି ବିଭିନ୍ନ ପ୍ରଜାତିର ସୁନ୍ଦର ସୁସ୍ୱାଦୁ ଆମ୍ବ ଲଗାଇ ରୋଜଗାର କରୁଛନ୍ତି ବର୍ଷକୁ ଲକ୍ଷାଧିକ ଟଙ୍କା । ସମୟ ସହିତ କିନୁ ସିଂ ତାଙ୍କ ଆମ୍ବ ପାଇଁ ସ୍ୱୀକୃତି ପାଇବା ଆରମ୍ଭ କରିଛନ୍ତି ।
ସଫଳ ଚାଷୀ କିନୁ ସିଂ କହିଛନ୍ତି,‘‘2019 ମସିହାରୁ ମୁଁ ଆମ୍ବ ଚାଷ ଆରମ୍ଭ କରିଛି । ମାତ୍ର 2 ବର୍ଷ ମଧ୍ୟରେ ଗଛରେ ଆମ୍ବ ଫଳିଥିଲା । ଯାହାପରେ ମୁଁ କେବେ ପଛକୁ ଫେରି ଚାହିଁନି । ଏବେ 250 ଟି ଆମ୍ବ ଗଛ ରହିଛି। ପ୍ରତ୍ୟେକ ବର୍ଷ 2 ଲକ୍ଷ ପଖାପାଖି ଇନକମ୍ ହୋଇଥାଏ ।’’ ଅନ୍ୟପଟେ କୃଷି ବୈଜ୍ଞାନିକ ଡ଼ଃ. ସଞ୍ଜୟ ପ୍ରଧାନ କହିଛନ୍ତି,‘‘କିନୁ ସିଂ ନିଜ ପରିଶ୍ରମ ବଳରେ ସଫଳ ଚାଷୀ ହୋଇ ପାରିଛନ୍ତି । ଏହାସହ ନିଜ ଗାଁ ଲୋକଙ୍କ ପାଇଁ ମଧ୍ୟ ସେ ପ୍ରରଣା ପାଲଟିଛନ୍ତି । ଯୁବପିଢି ତାଙ୍କୁ ଦେଖି ଚାଷ କରିବା ପାଇଁ ଉତ୍ସାହ ପ୍ରକାଶ କରୁଛନ୍ତି ।’’
ଇଟିଭି ଭାରତ, ସୁନ୍ଦରଗଡ
