ସୁବର୍ଣ୍ଣପୁର: ସହରର ଘୋଡାଘାଟପଡାସ୍ଥିତ ବ୍ୟାସ ଆଶ୍ରମରେ ମା’ ଗଜଲକ୍ଷ୍ମୀଙ୍କ ପୂଜା ଆରମ୍ଭ ହୋଇଛି । ଆଜି ଆଶ୍ବିନ ପୂର୍ଣ୍ଣମୀ ତିଥିରେ ଅଧିବାସ କୁମ୍ଭ ସ୍ଥାପନ, ମଣ୍ଡଳ ପୂଜା, ନବଗ୍ରହ ପୂଜା, ଇନ୍ଦ୍ରାଦି ଦଶଦିଗପାଳ ପୂଜା ସହିତ ମା’ ଲକ୍ଷ୍ମୀ ,ମହାସରସ୍ବତୀ ,ମହାକାଳୀ ,ଇନ୍ଦ୍ରଦେବ ଓ ଗଜଙ୍କୁ ଆବାହନ କରାଯାଇଛି ।
କୁମ୍ଭ ସ୍ଥାପନ ପରେ ଆଦ୍ୟଦେବ ଶ୍ରୀ ଗଣେଶଙ୍କୁ ଆବାହନ କରି ମା’ ଗଜଲକ୍ଷୀଙ୍କ ସମେତ ପାର୍ଶ୍ବ ଦେବଦେବୀଙ୍କ ପୂଜା ଆରାଧନା ଆରମ୍ଭ କରାଯାଇଛି । ତେବେ ଏହି ପୂଜା କାର୍ତ୍ତିକ କୃଷ୍ଣ ଦଶମୀ ତିଥି ଯାଏଁ ଚାଲିବ । ଆଜି ହୋମ ଓ ଯଜ୍ଞ କାର୍ଯ୍ୟ ଆରମ୍ଭ ହୋଇଥିବାବେଳେ ପାରମ୍ପରିକ ରୀତିନୀତିରେ ପୂଜା ଆରାଧନା ଚାଲିଛି । ତେବେ କୋଭିଡ କଟକଣା ଭିତରେ ମା’ଙ୍କ ପୂଜା ଆରାଧନା କରାଯାଉଥିବାବେଳେ ୧୦ଦିନ ବ୍ୟାପୀ ସନ୍ଧ୍ୟାରେ ହେବାକୁ ଥିବା ସାଂସ୍କୃତିକ କାର୍ଯ୍ୟକ୍ରମ ଗୁଡିକୁ ବାତିଲ କରାଯାଇଛି । ସେହିପରି ମା’ଙ୍କ ଭସାଣ ଉତ୍ସବ ନିରାଡମ୍ବରେ ଭାବେ ପାଳନ କରିବା ପାଇଁ ବ୍ୟାସ ଆଶ୍ରମ ପୂଜା କମିଟିକୁ ନିର୍ଦ୍ଦେଶ ଦେଇଛି ଜିଲ୍ଲା ପ୍ରଶାସନ ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
