ସୁବର୍ଣ୍ଣପୁର: ସୋନପୁର ଗଡ଼ଜାତର ଇଷ୍ଟଦେବୀ ମାଆ ସୁରେଶ୍ବରୀ ଭୈରବୀ ବେଶରେ ଶ୍ରଦ୍ଧାଳୁଙ୍କୁ ଦର୍ଶନ ଦେଇଛନ୍ତି । ଆସନ୍ତାକାଲି(ସୋମବାର) ଦେବୀ ମାଆ ଭୁବନେଶ୍ଵରୀ ବେଶ ଧାରଣ କରିବେ । ଦେବୀ ମାଆ ସୁରେଶ୍ବରୀ ଆଶ୍ବିନ ମହାଳୟାଠାରୁ ଆରମ୍ଭ କରି ଦଶମୀ ତିଥି ଯାଏଁ ଭିନ୍ନଭିନ୍ନ ବେଶ ଧାରଣ କରିଥାନ୍ତି । ମହାଳୟାରେ ଦେବୀ ମାଆ ଧବଳମୁଖୀ ବେଶ ଧାରଣ କରିଥିବାବେଳେ ପ୍ରତିପଦରେ କାଳୀ, ଦ୍ଵିତୀୟାରେ ତାରା, ତୃତୀୟାରେ ଷୋଡ଼ଶୀ ବେଶ ଧାରଣ କରିବାର ପରମ୍ପରା ରହିଛି ।
ଏହି ପୀଠରେ ମହାଷ୍ଟମୀ ତିଥିରେ ମାଆ ମହିଷା ମର୍ଦ୍ଦିନୀ ଓ ମହାନବମୀ ତିଥିରେ ରାଜରାଜେଶ୍ୱରୀ ବେଶ ଦେଖିବା ପାଇଁ ଶ୍ରଦ୍ଧାଳୁଙ୍କ ସମାଗମ ହୋଇଥାଏ । ବର୍ଷ ତମାମ୍ ଦେବୀଙ୍କ ସଶରୀର ସିନ୍ଦୁର ପ୍ରଲେପ କରାଯିବା ସହିତ ଗାଢ ନାଲି ରଂଗର ବସ୍ତ୍ର ପରିଧାନ କରାଯାଉଥିବାବେଳେ ଭୈରବୀ ବେଶରେ ଦେବୀ ମାଆ ସୁନାରୁପା ଆଭୂଷଣରେ ସଜ୍ଜିତ ହୋଇ ସବୁଜ ପାଟ ବସ୍ତ୍ର ପରିଧାନ କରିଛନ୍ତି ।
ଏହି ପରିପ୍ରେକ୍ଷୀରେ ସୁବର୍ଣ୍ଣପୁରର ଐତିହାସିକ ବଳୀଯାତ୍ରା ଆରମ୍ଭ ହୋଇଛି । ଏହି ଶକ୍ତିପୀଠକୁ ଶ୍ରଦ୍ଧାଳୁମାନେ ବଳୀଯାତ୍ରାରେ ସାମିଲ ହୋଇ ଦେବୀ ମାଆ ସୁରେଶ୍ବରୀଙ୍କ କୃପା ଭିକ୍ଷା ସାଉଁଟିବାକୁ ଛୁଟି ଆସୁଛନ୍ତି । ଦେବୀଙ୍କ ସନ୍ଧ୍ୟା ଆଳତୀ ଦର୍ଶନ କରି ଦେବୀ କୃପା ଲାଭ କରୁଛନ୍ତି ଭକ୍ତ । ଶୃଙ୍ଖଳିତ ସନ୍ଧ୍ୟା ଆଳତୀ ଦର୍ଶନ ଓ କୋଭିଡ ନିୟମ ଅନୁପାଳନ କରିବାକୁ ସେବାୟତ ଓ ମନ୍ଦିର କମିଟିକୁ ଦେବୋତ୍ତର ବିଭାଗ ନିର୍ଦ୍ଦେଶ ଦେଇଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
