ନୟାଗଡ଼: ବାଘ ସହ ଫଟୋ ଉଠାଇବା ଯୁବକଙ୍କୁ ପଡ଼ିଲା ମହଙ୍ଗା । ଫଟୋ ଭାଇରାଲ ହେବା ପରେ ଦୀର୍ଘ ୪ ବର୍ଷ ପରେ ବାନ୍ଧିଲା ପୋଲିସ । ଗିରଫ ଯୁବକ ଜଣ (tiger hunter) କୁ ଭୁବନେଶ୍ବରରୁ ଗିରଫ କରି ଆଜି କୋର୍ଟ ଚାଲାଣ କରାଯାଇଛି ।
ଗିରଫ ଶିକାରୀ ଜଣକ ହେଉଛନ୍ତି ନୟାଗଡ଼ ଜିଲ୍ଲା ପଞ୍ଚୀରିଡା ବନାଞ୍ଚଳର ଗୋଡିପଲ୍ଲୀ ଗାଁର ସଞ୍ଜୟ ସ୍ବାଇଁ । ସଞ୍ଜୟକୁ ଭୁବନେଶ୍ବରରୁ ଗିରଫ କରିବା ସହ ଆଜି କୋର୍ଟ ଚାଲାଣ କରିଛି ନୟାଗଡ଼ ବନ ବିଭାଗ । ଏହା ସହ ସଞ୍ଜୟଙ୍କ ଘରୁ ଶିକାର ସାମଗ୍ରୀ ଜବତ କରିଛି ବନ ବିଭାଗ । ସଞ୍ଜୟକୁ ଗିରଫ କରିବାକୁ ବନ ବିଭାଗ ଫୋନ କଲ ଟ୍ରାକ କରିଥିଲା । ୪ବର୍ଷ ପୂର୍ବେ ବାଣୀଝରୀ ଜଙ୍ଗଲରୁ ଛୁଆ ଚିତାବାଘଟିକୁ ସଞ୍ଜୟ ସହ ୪ଜଣ ମିଶି ଶିକାର କରିଥିବା କହିଛନ୍ତି DFO କ୍ଷମା ଷଡ଼ଙ୍ଗୀ ।
ତେବେ ଜଣେ ଅଭିଯୁକ୍ତର ଦୁର୍ଘଟଣାରେ ମୃତ୍ୟୁ ହୋଇଥିବା ବେଳେ ଅନ୍ୟ ୨ଜଣ ରାଜ୍ୟ ବାହାରେ ଫେରାର ଅଛନ୍ତି । ସେମାନଙ୍କୁ ଗିରଫ ପାଇଁ ବନ ବିଭାଗ ପ୍ରୟାସ ଜାରି ରଖିଛି । ସଞ୍ଜୟକୁ ବନ ବିଭାଗ ଅଧିକ ପଚରା ଉଚୁରା କରିବା ସହ ବାଘ ଛାଲ ରାକେଟ ସହ କଣ ସମ୍ପର୍କ ରହିଛି ସେ ନେଇ ତଦନ୍ତ କରୁଛି । ଏହା ସହ ଆଜି ସେମାନଙ୍କୁ କୋର୍ଟ ଚାଲାଣ କରାଯାଇଛି ।
ସୂଚନା ଥାଉ କି ନୟାଗଡ଼ରେ ଏଭଳି ଘଟଣା ନୂଆ ନୁହେଁ । ୨୦୨୦ ମସିହାରେ ରଣପୁର ବନଖଣ୍ଡରେ ଏପରି ସମାନ ଦୃଶ୍ୟ ସାମ୍ନାକୁ ଆସିଥିଲା । ଠିକ ଏହିପରି ଏକ ଲାଇଭ ଫଟୋକୁ ଭିତ୍ତିକରି କ୍ରାଇମବ୍ରାଞ୍ଚ ଜଣେ ଅଭିଯୁକ୍ତଙ୍କୁ ଗିରଫ କରିଥିଲା ।
ଇଟିଭି ଭାରତ, ନୟାଗଡ
