ମୟୂରଭଞ୍ଜ: ଧିରେ ଧିରେ ବଢିବାରେ ଲାଗିଛି ବିଶ୍ବ ତାପମାନର କୁପରିମାଣ । ଅବକ୍ଷୟ ହେବାରେ ଲାଗିଛି ଜଙ୍ଗଲ । ବିଶ୍ବ ପାଇଁ ଏହା ଏକ ଚିନ୍ତାର କାରଣ ପାଲଟିଥିବା ବେଳେ ନୂଆ ଉପାୟରେ ବନୀକରଣ ପାଇଁ ଆରମ୍ଭ ହୋଇଛି ପ୍ରୟାସ । ଏଥିରେ କଲେଜ ଛାତ୍ରଛାତ୍ରୀମାନଙ୍କୁ ତାଲିମ ଦେଇ ମଞ୍ଜିଯୁକ୍ତ ବଲ ପ୍ରସ୍ତୁତ କରିବା ଶିଖାଯାଉଛି । ଏହା ସାହାଯ୍ୟରେ ଅପହଞ୍ଚ ପାହାଡିଆ ଅଞ୍ଚଳରେ ଜଙ୍ଗଲ ସୃଷ୍ଟି କରାଯାଇପାରେ ବୋଲି ଆଶା ସଞ୍ଚାର କରାଯାଇଛି ।
ଶୁକ୍ରବାର ଏନେଇ ଉତ୍ତର ଓଡିଶା ବିଶ୍ବବିଦ୍ୟାଳୟରେ ସୁପର 30 ସବୁଜ ଓଡିଶା ପକ୍ଷରୁ ଏକ କର୍ମଶାଳାର ଆୟୋଜନ କରାଯାଇଥିଲା । ଏଥିରେ ଛାତ୍ରଛାତ୍ରୀମାନଙ୍କୁ ମଞ୍ଜିଯୁକ୍ତ ବଲ ପ୍ରସ୍ତୁତ କରିବା ଶିଖାଯାଇଥିଲା । ଏଥିସହ ଏହି ବଲ ସାହାଯ୍ୟରେ କିପରି ଅପହଞ୍ଚ ଇଲାକାରେ ପହଞ୍ଚି ଜଙ୍ଗଲ ସୃଷ୍ଟିର ସମ୍ଭାବନା ସୃଷ୍ଟି କରାଯାଇପାରିବ ସେନେଇ ବାର୍ତ୍ତା ଦିଆଯାଇଥିଲା ।
ଏହାର ମୂଳ ଉଦ୍ଦେଶ୍ୟ ହେଉଛି ଫୋପାଡି ଦିଆଯାଉଥିବା ବା ନଷ୍ଟ ହେଉଥିବା ମଞ୍ଜିଗୁଡିକୁ ଜୈବିକ ବଲରେ ପରିଣତ କରି ସେଥିରୁ ଜଙ୍ଗଲ ସୃଷ୍ଟି କରିବା । ତେବେ ଏହି ପ୍ରୟାସ ଯେ କେତେ ଫଳପ୍ରଦ ତାହା ଆଗାମୀ ସମୟ ହିଁ କହିବ ବୋଲି ମତ ପ୍ରକାଶ କରିଛନ୍ତି ପରିବେଶବିତ୍ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
