ଖୋର୍ଦ୍ଧା: ଦିଲ୍ଲୀରୁ ପଲ୍ଲୀ ପର୍ଯ୍ୟନ୍ତ ପାଳନ ହେଉଛି ପବିତ୍ର ଗାନ୍ଧୀ ଜୟନ୍ତୀ । କିନ୍ତୁ ବିଶ୍ଵାମିତ୍ର ଜନସେବା ଟ୍ରଷ୍ଟ ପକ୍ଷରୁ ନିଆରା ଢଙ୍ଗରେ ଏହି ଦିବସକୁ ପାଳନ କରାଯାଇଛି । ଗାନ୍ଧୀ ଜୟନ୍ତୀ ଅବସରରେ ସାମ୍ପ୍ରଦାୟିକ ସଦଭାବନା ଅଭିଯାନ ଆରମ୍ଭ କରିଛି ଏହି ବିଶ୍ଵାମିତ୍ର ଜନସେବା ଟ୍ରଷ୍ଟ ।
ଗାନ୍ଧୀ ଜୟନ୍ତୀ ଅବସରରେ ବିଶ୍ଵାମିତ୍ର ଜନସେବା ଟ୍ରଷ୍ଟ ପକ୍ଷରୁ ଏହି ସାମ୍ପ୍ରଦାୟିକ ସଦଭାବନା ଅଭିଯାନ ଦୀର୍ଘ ତିନି ଦିନ ବ୍ୟାପି ହେବାକୁ ଥିବା ବେଳେ ଗତକାଲି ହିନ୍ଦୁ ମୁସଲିମ ଭାଇଚାରାର ଗାଁ କାଇପଦର ପୀର ବାବାଙ୍କ ପୀଠରୁ ଆରମ୍ଭ ହୋଇଛି । ଏହି ଯାତ୍ରା ବୋଲଗଡ଼ ବ୍ଲକ ମାଣିକାଗୋଡା ଠାରେ ଶେଷ ହେବ ବୋଲି ଜଣାପଡିଛି । ୭୫ କିଲୋମିଟର ଏହି ଯାତ୍ରା ଗାଁ ଗାଁ ବୁଲି ଗାନ୍ଧୀଙ୍କ ବାର୍ତ୍ତା ପ୍ରଦାନ କରିବ । ହିନ୍ଦୁ ମୁସଲମାନ ଭାଇଚାରାର ଯାତ୍ରା ବାଘମାରୀ ପରିକ୍ରମା କରି ଗଁପୁର ଠାରେ ପହଞ୍ଚିଥିଲା ।
ଅନ୍ନପୂର୍ଣ୍ଣା ଫାଇନାନ୍ସର ପରିଚାଳନା ନିର୍ଦ୍ଦେଶକ ସଂଜୟ ପଟ୍ଟନାୟକ ଗାନ୍ଧୀଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ ପରେ ବିଭିନ୍ନ ସଚେତନତା ବାର୍ତ୍ତା ଲେଖାଥିବା ପ୍ଲାକାର୍ଡ ଧରି ଲୋକମାନଙ୍କୁ ସଚେତନ କରିଥିଲେ । ପରେ କୁଶୁପଲ୍ଳାରେ ରାତ୍ରି ଯାପନ ପରେ ସୋମବାର ସକାଳୁ ଏହି ଯାତ୍ରା ଆରମ୍ଭ ହେବ ବୋଲି ଜଣାପଡିଛି । ବିଶ୍ଵାମିତ୍ର ଟ୍ରଷ୍ଟର ଅଧ୍ୟକ୍ଷ ରାମଶଙ୍କର ନିଜସ୍ବ ପେନସନ ଟଙ୍କାରେ ଏହି ନିଆରା ଯାତ୍ରା କରୁଥିବା ବେଳେ ଗାନ୍ଧୀଶାନ୍ତି ପ୍ରତିଷ୍ଠାନ, ରାଷ୍ଟ୍ରୀୟ ଯୁବ ସଂଗଠନ ଏଥିରେ ସାମିଲ ହୋଇଛନ୍ତି ।
ଇଟିଭି ଭାରତ, ଖୋର୍ଦ୍ଧା
