ଭୁବନେଶ୍ବର: ଭୁବନେଶ୍ବରରେ ଆୟୋଜିତ ହୋଇଯାଇଛି 'ପୋର୍ଟ୍ରାୟାଲ୍ ଅଫ୍ ଚିଲ୍ଡ୍ରେନ୍ ଇନ୍ ମିଡିଆ' ଶୀର୍ଷକର ଏକ ମିଡିଆ ରାଉଣ୍ଡ୍ ଟେବୁଲ୍ । ଶିଶୁ ଅଧିକାରର ସୁରକ୍ଷା ଓ ପ୍ରଚାର ପ୍ରସାରରେ ଗଣମାଧ୍ୟମର ଗୁରୁତ୍ବପୂର୍ଣ୍ଣ ଭୂମିକା ଉପରେ ଗୁରୁତ୍ବାରୋପ କରିବା ପାଇଁ ଶୁକ୍ରବାର ଭୁବନେଶ୍ବରରେ ୟୁନିସେଫ୍ ପକ୍ଷରୁ ଓଡ଼ିଶା 'ଓମେନ୍ ଇନ୍ ମିଡିଆ' (ଓଡବ୍ଲୁଏମ୍) ସହଯୋଗରେ 'ପୋର୍ଟ୍ରାୟାଲ୍ ଅଫ୍ ଚିଲ୍ଡ୍ରେନ୍ ଇନ୍ ମିଡିଆ' ଶୀର୍ଷକ ଏକ ମିଡିଆ ରାଉଣ୍ଡ ଟେବୁଲ୍ ଅନୁଷ୍ଠିତ ହୋଇଛି । ଏହି କାର୍ଯ୍ୟକ୍ରମରେ ପିଲାମାନଙ୍କୁ ବୁଝିବା ଏବଂ ସେମାନଙ୍କ ଅନନ୍ୟ କାହାଣୀ ଉପରେ ଗଣମାଧ୍ୟମର ପ୍ରଭାବ ବିଷୟରେ ଏକ ଗୁରୁତ୍ବପୂର୍ଣ୍ଣ ବାର୍ତ୍ତାଳାପ କରାଯାଇଥିଲା । ଏହି କାର୍ଯ୍ୟକ୍ରମରେ ଆଲୋଚନାଚକ୍ର ଏବଂ ପ୍ୟାନେଲରେ ଯୁବପୀଢ଼ିଙ୍କ ଚିତ୍ରକଳା ଉପରେ ଗଣମାଧ୍ୟମର ଗଭୀର ପ୍ରଭାବ ବିଷୟରେ ଆଲୋଚନା କରାଯାଇଥିଲା । ଏହି ଆଲୋଚନାରେ ସାମ୍ବାଦିକ ଓ ଗଣମାଧ୍ୟମ କ୍ଷେତ୍ରର ଅଭିଜ୍ଞ ବ୍ୟକ୍ତିଙ୍କ ସହ ଗଣମାଧ୍ୟମ କଲେଜର ଛାତ୍ରଛାତ୍ରୀ ଉପସ୍ଥିତଥିଲେ ।
ଏହି ଅବସରରେ ଗଣମାଧ୍ୟମକୁ ସମ୍ବୋଧିତ କରି ୟୁନିସେଫ୍ ଭୁବନେଶ୍ବର କ୍ଷେତ୍ର କାର୍ଯ୍ୟାଳୟର ମୁଖ୍ୟ ବିଲିୟମ ହାନ୍ଲୋନ ଜୁନିୟର କହିଥିଲେ, "ଆମ ଯୁବପୀଢ଼ିର ମଙ୍ଗଳ ଓ ଭବିଷ୍ୟତ ପାଇଁ ଅବଦାନ ରଖୁଥିବା ବର୍ଣ୍ଣନାକୁ ଆକାର ଦେବା ପାଇଁ ଗଣମାଧ୍ୟମର ଶକ୍ତି ରହିଛି ।" ପ୍ରତ୍ୟେକ ପିଲାଙ୍କ କାହାଣୀକୁ ପ୍ରାମାଣିକତା, ସହାନୁଭୂତି ଏବଂ ସମ୍ମାନର ସହ କହିବା ଉଚିତ ବୋଲି ସେ କହିଛନ୍ତି । ସେହିପରି ୟୁନିସେଫ୍ ଓଡିଶାର ସାମାଜିକ ନୀତି ବିଶେଷଜ୍ଞ ଅଜୟ ସିଂହ କହିଛନ୍ତି, "ଆଜିର ଗୋଲ୍ଟେବୁଲ ବୈଠକର ଉଦ୍ଦେଶ୍ୟ ହେଉଛି, ଶିଶୁ ଅଧିକାରକୁ ଗଣମାଧ୍ୟମରେ ଭଲ ଭାବରେ ଉପସ୍ଥାପନ କରିବା । ପ୍ରିଣ୍ଟ ହେଉ ବା ଟେଲିଭିଜନ ଏବଂ ଡିଜିଟାଲ ମିଡିଆରେ ପିଲାମାନଙ୍କୁ କିପରି ଖବର ସଂଗ୍ରହ ସମୟରେ ଚିତ୍ରଣ କରୁଛେ, ତାହାକୁ ସୁନିଶ୍ଚିତ କରିବା । ପିଲାଙ୍କ ବିଷୟରେ ଖବର ଗ୍ରହଣ କରିବା ସମୟରେ ଆମେ ନିଶ୍ଚିତ ଭାବେ ସକରାତ୍ମକ ହେବା ଆବଶ୍ୟକ । ସେମାନଙ୍କ ପାଇଁ ରିପୋର୍ଟିଂରେ ମଧ୍ୟ ଗୋପନୀୟତା ରକ୍ଷା କରିବା ଉଚିତ ।" ଆମକୁ ତୁଚ୍ଛ ସମସ୍ୟା ଅପେକ୍ଷା ଅଧିକାର ସମସ୍ୟାକୁ ପ୍ରାଥମିକତା ଦେବା ଉଚିତ୍ ବୋଲି ସେ କହିଛନ୍ତି ।
ଏହା ମଧ୍ୟ ପଢ଼ନ୍ତୁ...ବରଗଡରେ ଶିଶୁ କର୍କଟ ସଚେତନତା କାର୍ଯ୍ୟକ୍ରମ ଅନୁଷ୍ଠିତ
ଏନେଇ ବରିଷ୍ଠ ସାମ୍ବାଦିକ ସନ୍ଦୀପ ସାହୁ କହିଛନ୍ତି, "ଶିଶୁଙ୍କ ପାଇଁ ଖବର ସଂଗ୍ରହ ଓ ସାମ୍ବାଦିକତା କରିବା ସମୟରେ କିଛି ନିୟମ ପାଳନ କରିବାକୁ ପଡ଼ିଥାଏ । ଯେହେତୁ ଏମାନେ ଅତ୍ୟନ୍ତ ସମ୍ବେଦନଶୀଳ ହୋଇଥାନ୍ତି, ସାମ୍ବାଦିକମାନେ ରିପୋର୍ଟିଂ କରିବା ସମୟରେ ସବୁବେଳେ ପିଲାଙ୍କ ପରିଚୟ ଲୁଚାଇ ରଖିବା ଉଚିତ । କାରଣ ଏଥିରେ ପିଲାଙ୍କ ନାମ, ବାପା ମାଆଙ୍କ ନାମ, ସମ୍ପର୍କୀୟଙ୍କ ନାମ, ଘର କିମ୍ବା ଏପରିକି ସ୍କୁଲର ନାମ ମଧ୍ୟ ସାମିଲ ରହିଛି । ଗୋଟିଏ ଦାୟିତ୍ବହୀନତା ଶିଶୁକୁ ଆଘାତ ଦେଇପାରେ ଏବଂ ତା'ର କିମ୍ବା ତା'ର ମାନସିକ ସ୍ବାସ୍ଥ୍ୟକୁ ସବୁଦିନ ପାଇଁ ପ୍ରଭାବିତ କରିପାରେ । ତେଣୁ ଏହି ଦିଗରେ ସମ୍ବାଦଦାତାଙ୍କୁ ଧ୍ୟାନ ଦେଇ ସମ୍ବାଦ ବା ଖବର ପରିବେଷଣର ଆବଶ୍ୟକତା ରହିଛି । ସମସ୍ତ ସାମ୍ବାଦିକମାନେ ସେମାନଙ୍କ ଉତ୍ତମ ବୁଝାମଣା ପାଇଁ ୟୁନିସେଫ୍ ଏବଂ ଏନସିପିସିଆର୍ ଦ୍ବାରା ଶିଶୁ ଅଧିକାର ଉପରେ ନିର୍ଦ୍ଦେଶାବଳୀକୁ ଅନୁଧ୍ୟାନ କରି ଖବର କରିବାର ଆବଶ୍ୟକ ରହିଛି ।"
ସେହିପରି ଗଣମାଧ୍ୟମରେ ପିଲାମାନଙ୍କର ସଠିକ ଚିତ୍ରଣ ଉପରେ ବକ୍ତବ୍ୟ ରଖି ଓଡବ୍ଲ୍ୟୁଏମ୍ ସଭାପତି କସ୍ତୁରୀ ରାୟ କହିଥିଲେ, "ସମ୍ବାଦଦାତା ଭାବେ ଆମେମାନେ ଶିଶୁମାନଙ୍କ ଉପରେ ଖବର ପରିବେଷଣରେ ଆମର ବର୍ତ୍ତମାନର ଧାରାକୁ ସମାଲୋଚିତ କରିବା ଏବଂ ପରିବର୍ତ୍ତନର ଆବଶ୍ୟକତାକୁ ଚିହ୍ନିବା ଅତ୍ୟନ୍ତ ଜରୁରୀ । ଆମେ ଆମର କଲମ ଏବଂ କ୍ୟାମେରାରେ ଧାରଣ କରିଥିବା 'ଶକ୍ତି'କୁ ସ୍ବୀକାର କରିବା । 'ଶକ୍ତି' ଯାହା ସଶକ୍ତ କରିପାରିବ କିମ୍ବା ଶୋଷଣ ମଧ୍ୟ କରିପାରିବ । ଆମର କାହାଣୀଗୁଡ଼ିକ ସାମାଜିକ ବୁଝାମଣାକୁ ଆକାର ଦେଇପାରିବ, ପିଲାମାନଙ୍କର କଲ୍ୟାଣରେ ଯୋଗଦାନ କରିପାରିବ କିମ୍ବା କ୍ଷତିକାରକ ରୁଢ଼ି ଏବଂ ଭୁଲ ଉପସ୍ଥାପନାକୁ ସ୍ଥାୟୀ କରିଦେଇପାରିବ ।"
ଇଟିଭି ଭାରତ, ଭୁବନେଶ୍ବର
