ଭୁବନେଶ୍ବର: 5ଟି ସଫଳତାକୁ ନେଇ ବହି ପଢିବେ ପାଠକ । ବହି କହିବ ନବରଙ୍ଗପୁର ଜିଲ୍ଲାର ସଫଳତାର କାହାଣୀ । 5ଟି ମ୍ୟାଜିକ ମନ୍ତ୍ର ନେଇ ବହି ଉନ୍ମୋଚିତ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଦ ମ୍ୟାଜିକ ମନ୍ତ୍ର ଅଫ ଫାଇଭ ଟି: ଏ ଟେଲ ଅଫ ଟ୍ରାନ୍ସଫର୍ମିଂ ନବରଙ୍ଗପୁର’ ପୁସ୍ତକ ଲୋକାର୍ପିତ ହୋଇଛି । ନବୀନ ନିବାସରେ ମୁଖ୍ୟମନ୍ତ୍ରୀ ଏହି ପୁସ୍ତକ ଲୋକାର୍ପଣ କରିଛନ୍ତି । ବରିଷ୍ଠ ପ୍ରଶାସକ ତଥା ପଶ୍ଚିମ ଓଡିଶା ବିକାଶ ପରିଷଦର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଅଜିତ କୁମାର ମିଶ୍ର ମ୍ୟାଜିକ ମନ୍ତ୍ର ଅଫ ଫାଇଭ ଟି: ଏ ଟେଲ ଅଫ ଟ୍ରାନ୍ସଫର୍ମିଂ ନବରଙ୍ଗପୁର’ ପୁସ୍ତକ ଲେଖିଛନ୍ତି । ଲୋକାର୍ପଣ ଉତ୍ସବରେ ଫାଇଭ ଟି ଅଧ୍ୟକ୍ଷ ତଥା ନବୀନ ଓଡିଶା ମୁଖ୍ୟ ଭିକେ ପାଣ୍ଡିଆନ ଉପସ୍ଥିତି ଥିଲେ ।
ରାଜ୍ୟର ଅଗ୍ରଣୀ ପ୍ରକାଶନ ସଂସ୍ଥା ପେନ ଇନ ବୁକ୍ସ ଦ୍ୱାରା ପ୍ରକାଶିତ ଏହି ପୁସ୍ତକରେ ଫାଇଭ ଟି ମନ୍ତ୍ର ଦ୍ୱାରା ଅନୁପ୍ରେରିତ ନବରଙ୍ଗପୁର ଜିଲ୍ଲାର ରୂପାନ୍ତରଣର ସଫଳ କାହାଣୀ ଚିତ୍ରିତ ହୋଇଛି । ଅଜିତ କୁମାର ମିଶ୍ର ନବରଙ୍ଗପୁର ଜିଲ୍ଲାରେ ୨୦୧୮ ରୁ ୨୦୨୧ ମସିହା ପାର୍ଯ୍ୟନ୍ତ ଜିଲ୍ଲାପାଳ ଥିଲେ । ଏହି ସମୟ ମଧ୍ୟରେ ଶିକ୍ଷା, ସ୍ୱାସ୍ଥ୍ୟ, କୃଷି, ଗମନାଗମନ, ପ୍ରାଣୀ ସମ୍ପଦ, ଜଙ୍ଗଲ ପରିବେଶ ତଥା ଜଳବାୟୁ ପରିବର୍ତ୍ତନ କ୍ଷେତ୍ରରେ ଉଲ୍ଲେଖ ଯୋଗ୍ୟ ବିକାଶ ସମ୍ଭବପର ହୋଇଥିଲା । ଫଳ ସ୍ୱରୂପ ୨୦୧୮ରେ ୧୧୨ ଆକାଂକ୍ଷୀ ଜିଲ୍ଲା ମଧ୍ୟରୁ ୧୦୯ ସ୍ଥାନରେ ଥିବା ନବରଙ୍ଗପୁର ଜିଲ୍ଲା ୨୦୨୧ ବେଳକୁ ସମଗ୍ର ଦେଶରେ ୧୩ ତମ ସ୍ଥାନକୁ ଉନ୍ନୀତ ହୋଇଥିଲା । ଏହା ସହ ରାଜ୍ୟରେ ପ୍ରଥମ ସ୍ଥାନ ଅଧିକାର କରିଥିଲା । ଭିଏତନାମରେ ଅନୁଷ୍ଠିତ ବିଶ୍ୱ ସମ୍ମିଳନୀରେ ନବରଙ୍ଗପୁର ବିକାଶ ମଡ଼େଲ ପ୍ରଶଂସିତ ହେବା ସହ ମର୍ଯ୍ୟାଦାଜନକ ସ୍କଚ ଆୱାର୍ଡରେ ସମ୍ମାନିତ ହୋଇଥିଲା ।
ଅବିଭକ୍ତ କଳାହାଣ୍ଡି ଜିଲ୍ଲାରେ ୧୯୬୧ ମସିହାରେ ଅଜିତ କୁମାର ମିଶ୍ରଙ୍କ ଜନ୍ମ । ସମ୍ବଲପୁର ବିଶ୍ୱବିଦ୍ୟାଳୟରୁ ସେ ସ୍ନାତକୋତ୍ତର ଶେଷ କରିଥିଲେ । ପରବର୍ତ୍ତୀ ସମୟରେ ସେ ଦିଲ୍ଲୀ ବିଶ୍ୱବିଦ୍ୟାଳୟରୁ ରାଜନୀତି ବିଜ୍ଞାନରେ ପିଏଚଡି ଉପାଧି ଲାଭ କରିଥିଲେ । ଅଜିତ କୁମାର ମିଶ୍ର ୧୯୮୯ରେ ଓଡିଶା ପ୍ରଶାସନରେ ଯୋଗ ଦେଇଥିଲେ । ମୟୂରଭଞ୍ଜ ଜିଲ୍ଲାରୁ ସେ ପ୍ରଶାସକ ଭାବେ କାର୍ଯ୍ୟ ଆରମ୍ଭ କରିଥିଲେ । ସେ ଅତୀତରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟର ସ୍ୱତନ୍ତ୍ର ଅଧିକାରୀ ଭାବରେ ଦାୟିତ୍ୱ ତୁଲାଇଛନ୍ତି । ନବରଙ୍ଗପୁର ଜିଲ୍ଲାପାଳ ଭାବେ ଦାୟିତ୍ୱ ନେବା ପୂର୍ବରୁ ସେ ବିଭିନ୍ନ ବ୍ଲକ ଉନ୍ନୟନ ଅଧିକାରୀ, ଉପ ଜିଲ୍ଲାପାଳ, ବ୍ରହ୍ମପୁର ମହାନଗର ନିଗମ କମିଶନର ଭାବରେ ସଫଳତା ସହ ଦାୟିତ୍ୱ ନିର୍ବାହ କରି ପ୍ରଶଂସିତ ହୋଇଛନ୍ତି ।
ସେହିପରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଡାକ୍ତର ବିଜୟଲକ୍ଷ୍ମୀ ମହାନ୍ତିଙ୍କ ପ୍ରେସିଡେଣ୍ଟ ଦ୍ରୌପଦୀ ମୁର୍ମୁ- ଏ ରିଫ୍ଲେକ୍ସନ ଅଫ ଚେଞ୍ଜିଙ୍ଗ ଭାରତ ପୁସ୍ତକ ମଧ୍ୟ ଲୋକାର୍ପଣ କରିଛନ୍ତି । ଉକ୍ତ ପୁସ୍ତକରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଏକ ଜୀବନୀ ଚିତ୍ର ରହିଛି । ଯାହାକି ମୟୂରଭଞ୍ଜ ଏବଂ ଓଡିଶାର ସାମାଜିକ ସାଂସ୍କୃତିକ ଜୀବନୀ ଉପରେ ପର୍ଯ୍ୟାବେସିତ । ଲେଖିକା ଡାକ୍ତର ବିଜୟଲକ୍ଷ୍ମୀ ମହାନ୍ତି ଜଣେ ଆଧ୍ୟାତ୍ମିକବାଦୀ ନେତ୍ରୀ ଏବଂ ଶିକ୍ଷକ ।
ଇଟିଭି ଭାରତ, ଭୁବନେଶ୍ବର
