କେନ୍ଦୁଝର: ସ୍ବାମୀ-ସ୍ତ୍ରୀ ସମ୍ପର୍କରେ ଲାଗିଲା ରକ୍ତ ଛିଟା । ନିଜ ସିନ୍ଦୁର ନିଜେ ପୋଛିଦେଲା ସ୍ତ୍ରୀ । ସହି ପାରିଲାନି ସ୍ବାମୀର ନିର୍ଯାତନା ଶାବଳରେ ପିଟି ସ୍ବାମୀକୁ ହତ୍ୟା କଲା ପତ୍ନୀ । ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ଏଭଳି ଏକ ଘଟଣା ଦେଖିବାକୁ ମିଳିଛି କେନ୍ଦୁଝର ଜିଲ୍ଲାରେ ।
ସୂଚନା ଅନୁସାରେ, କେନ୍ଦୁଝର ଜିଲ୍ଲା ଟାଉନ ଥାନା ଅନ୍ତର୍ଗତ କୋଡିପଶା ଗ୍ରାମର ସ୍ୱାମୀ ଟୁରା ତାର ପତ୍ନୀ ସୁନୀତା ଜୁଆଙ୍ଗ ଓ 4 ଛୁଆଙ୍କ ସହ ରହୁଥିଲେ । ଟୁରା ପ୍ରତିଦିନ ମଦ ପିଇ ବାରମ୍ବାର ପତ୍ନୀକୁ ଅଶ୍ଳୀଳ ଭାଷାରେ ଗାଳି ଗୁଲଜ କରିବା ସହ ମାଡ଼ ମାରୁଥିଲା । ତେବେ ଗତ ରବିବାର ରାତିରେ ସ୍ବାମୀର ନିର୍ଯାତନାରେ ଅସହ୍ୟ ହୋଇ ଘରେ ଥିବା ଶାବଳରେ ସ୍ବାମୀକୁ ଆକ୍ରମଣ କରିଥିଲା ସ୍ତ୍ରୀ । ଫଳରେ ଘଟଣାସ୍ଥଳରେ ହିଁ ଟୁରାର ମୃତ୍ୟୁ ହୋଇଥିଲା । ତେବେ ଗତ ରବିବାର ରାତିରୁ ଏହି ଘଟଣା ଘଟିଥିବା ବେଳେ ଦୀର୍ଘ ତିନି ଦିନ ଧରି ଟୁରାର ମୃତଦେହ ଘରେ ପଡିରହିଥିଲା । ସେପଟେ ଚାରି ଛୁଆଙ୍କୁ ଧରି ସୁନୀତା ସେହି ଘରେ ରହି ଆସୁଥିଲା। ଖବର ପାଇ ଘଟଣାସ୍ଥଳରେ ଟାଉନ IIC, ସଦର SDPO ପହଞ୍ଚି ମୃତଦେହକୁ ଜବତ କରି ସୁନୀତାକୁ ଗିରଫ କରିବା ସହ ଅଧିକ ତଦନ୍ତ ଚଳାଇଛନ୍ତି ।
ଏହା ମଧ୍ୟ ପଢ଼ନ୍ତୁ....ଶାରିରୀକ ସମ୍ପର୍କ ପାଇଁ ମନା କଲା ସ୍ତ୍ରୀ, ଜୀବନ ହାରିଲେ ଦାଦନ ଶ୍ରମିକ: ହାଇଦ୍ରାବାଦରୁ ଆସିଲା ମୃତଦେହ
ପୂର୍ବରୁ ମଧ୍ୟ ବରଗଡ଼ ସହର ସ୍ଥିତ 16 ନମ୍ବର ୱାର୍ଡ଼ ଡେମ କଲୋନୀଠାରେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଥିଲା । ମଦ ନିଶାରେ ମାତାଲ ହୋଇ ସ୍ତ୍ରୀ ନିଜ ସ୍ବାମୀକୁ ହତ୍ୟା କରିଥିଲା । ମଦ ପିଇ ନିଶା ଚଢିବା ପରେ ଦମ୍ପତିଙ୍କ ମଧ୍ୟରେ ବଚସା ହୋଇଥିଲା । ପରେ ନିଶାସକ୍ତ ଅବସ୍ଥାରେ ସ୍ବାମୀକୁ ହତ୍ୟା କରିଥିଲା ସ୍ତ୍ରୀ । ମୃତ ବ୍ୟକ୍ତି ଜଣକ 55 ବର୍ଷୀୟ ବୁଲୁ ବାରିକ ଜଣା ପଡ଼ିଥିଲା । ବରଗଡ଼ ଡ୍ୟାମ୍ କଲୋନୀ ଠାରେ ବୁଲୁ ବାରିକଙ୍କ ମୃତଦେହ ପଡ଼ିଥିବା ଦେଖି ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ । ଖବର ପାଇ ଟାଉନ ଥାନା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିଥିଲା । ଏହାପରେ ଘଟଣାସ୍ଥଳର ପାରିପାର୍ଶ୍ଵିକ ସ୍ଥିତି ଅନୁଧ୍ୟାନ କରି ମୃତ ବ୍ୟକ୍ତିଙ୍କ ସ୍ତ୍ରୀ ଜ୍ୟୋତି ବାରିକଙ୍କୁ ପଚରାଉଚରା କରିଥିଲା ପୋଲିସ । ମୃତକଙ୍କ ସ୍ତ୍ରୀ ମୁଣ୍ଡରେ ଗଭୀର ଆଘାତ ଲାଗିଥିବା ବେଳେ ରାତିରେ ଉଭୟ ସ୍ୱାମୀ-ସ୍ତ୍ରୀଙ୍କ ଭିତରେ ଗଣ୍ଡଗୋଳ ହୋଇଥିଲା । ଏହାପରେ ଉଭୟ ଶୋଇ ପଡିଥିଲେ । ମାତ୍ର ହତ୍ୟା ବିଷୟରେ ସେ କିଛି ଜାଣିନଥିବା ପୋଲିସକୁ ମହିଳା ଜଣକ କହିଥିଲେ । ତେବେ ଅଧିକ ତଦନ୍ତ ପରେ ଏହା ଏକ ହତ୍ୟାକାଣ୍ଡ ହୋଇଥିବା ପୋଲିସ ଜାଣିବାକୁ ପାଇଥିଲା । ଉଭୟ ସ୍ୱାମୀ ଓ ସ୍ତ୍ରୀଙ୍କ ମଧ୍ୟରେ ଗଣ୍ଡଗୋଳ ସମୟରେ ସ୍ତ୍ରୀର ଆକ୍ରମଣରେ ସ୍ୱାମୀର ମୃତ୍ୟୁ ହୋଇଥିବା ନେଇ ପୋଲିସ ସନ୍ଦେହ କରି ଜ୍ୟୋତି ବାରିକକୁ ଅଟକ ରଖି ଜେରା କରିଥିଲା । ପରେ ମହିଳା ଜଣକ ନିଶାସକ୍ତ ଅବସ୍ଥାରେ ସ୍ୱାମୀକୁ ମାଡ଼ ମାରିଥିବା ଜଣାଇଥିଲା । ସ୍ତ୍ରୀ ମାଡ଼ରେ ସ୍ୱାମୀର ମୃତ୍ୟୁ ହୋଇଥିବାରୁ ମହିଳା ଜଣଙ୍କୁ ଗିରଫ କରିଥିଲା ପୋଲିସ ।
ଇଟିଭି ଭାରତ, କେନ୍ଦୁଝର
